Trump bannar fyrirtækjum að nota erlenda fjarskiptatækni

Donald Trump Bandaríkjaforseti lýsti í dag yfir neyðarástandi til að réttlæta bann við því að bandarísk tæknifyrirtæki noti erlendan tæknibúnað sem yfirvöld telja geta stefnt þjóðaröryggi í hættu. Ákvörðunin er talin nýjasta útspil Trump í viðskiptastríði hans við Kínverja.

Ekkert ákveðið ríki eða fyrirtæki er nefnt í forsetatilskipuninni sem Trump gaf út í dag. New York Times segir að tilskipunin útiloki hins vegar kínverska tæknifyrirtækið Huawei frá því að taka þátt í 5G-væðingu bandarískra fjarskiptakerfa.

Í henni er fullyrt að óvinveitt erlend ríki reyni að nýta sér veikleika í fjarskiptatækni og þjónustu Bandaríkjanna, ekki síst í þágu efnahags- og iðnnjósna. Bandarísk yfirvöld fá nú að banna viðskipti þarlendra fyrirtækja við fyrirtæki sem eru á valdi óvinveittra erlendra ríkja sem ógni öryggi Bandaríkjanna.

Bandarísk stjórnvöld hafa áður hótað bandamönnum sínum að þau muni hætta að deila upplýsingum með þeim ef þau kaupa kínverska tækni til að byggja um 5G-kerfi. Þau telja að kínversk fyrirtæki muni geta stýrt fjarskiptakerfunum og haft aðgang að samskiptum sem fara fram yfir þau.

Viðskiptastríð geisar nú á milli Bandaríkjanna og Kína. Ríkin tvö hafa skipst á að leggja innflutningstolla upp á hundruð milljarða dollara á vörur hvor annars.