Endar Buffon óvænt á Nývangi?

Guainluigi Buffon gæti óvænt verið á leið til Barcelona eftir að samningi hans lauk við frönsku meistarana í PSG en Sky á Ítalíu greinir frá.

Buffon samdi síðasta sumar til eins árs við frönsku meistarana og ákváðu aðilarnir að leiðir myndu skilja eftir að Buffon hafi verið inn og út úr liðinu hjá PSG í vetur.

Nú gæti ítalska goðsögnin hins vegar óvænt verið á leið til Barcelona en Börsungar leita nú að varamarkverði fyrir Marc-Andre ter Stegen því Jasper Cillessen hugsar sér til hreyfings.

Cillessen hefur verið orðaður burt frá Barcelona en hann vill fara að spila. Manchester United hefur verið nefnt í því samhengi en hann fer bara til United yfirgefi David de Gea félagið.

Buffon, sem varð heimsmeistari árið 2006, vill halda áfram að spila og er með tilboð frá Brasilíu, Kína, Þýskalandi og Tyrklandi.