Fótbolti

Eru á því að portúgalska landsliðið sé miklu meira en bara Cristiano Ronaldo

Óskar Ófeigur Jónsson skrifar
Cristiano Ronaldo á æfingu með portúgalska landsliðinu.
Cristiano Ronaldo á æfingu með portúgalska landsliðinu. Getty/Craig Mercer
Í huga sumra er portúgalska landsliðið bara Cristiano Ronaldo og einhverjir tíu aðrir lítt leikmenn en þeir sem þekkja portúgalska boltann vita betur.

Portúgal er ríkjandi Evrópumeistari og verður á heimavelli í fyrstu lokakeppni Þjóðadeildarinnar sem hefst einmitt með undanúrslitaleik Portúgal og Sviss í dag.

Cristiano Ronaldo var nítján ára þegar Portúgal var á heimavelli á EM 2004 en núna eru margir aðrir ungir og efnilegir leikmenn í svipaðri stöðu. Þeir hafa Cristiano Ronaldo sér til halds og traust en Ronaldo hafði stjörnuleikmenn eins og Luis Figo og Rui Costa.

Leikur Portúgal og Sviss á Drekavöllum í Porto í kvöld hefst klukkan 18.45 og verður í beinni á Stöð 2 Sport alveg eins og leikur Englands og Hollands á morgun sem og úrslitaleikurinn á sunnudaginn.

Breska ríkisútvarpið fékk tvo Portúgala sem voru á sínum í ensku úrvalsdeildinni, Carlos Carvalhal og Luis Boa Morte, til að fara yfir stöðuna á portúgalska landsliðinu í dag og þeir eru bjartsýnir.





„Við vitum að einhvern daginn mun Ronaldo hætta að spila en við höfum svo mikið af hæfileikaríkum leikmönnum í næstu kynslóð hjá Portúgal,“ sagði Carlos Carvalhal, fyrrum stjóri Swansea og Sheffield Wednesday.

„Nú verður meira af hæfileikum í kringum Ronaldo en áður og leikmenn sem geta hjálpað honum. Þegar við skoðum einstaklingshæfileika þá er Portúgal í betri stöðu en áður,“ sagði Carvalhal.

Fernando Santos treystir enn á reynsluboltana Pepe, Joao Moutinho og auðvitað Ronaldo en menn eins og Nani, Ricardo Quaresma og Joao Mario voru ekki valdir að þessu sinni. Í stað þeirra er liðið fullt af framtíðarmönnum.

Þrír leikmenn í portúgalska hópnum hafa ekki leikið landsleik áður og einn af þeim er hinn 19 ára gamli Joao Felix frá Benfica. Joao Felix er líklega á leiðinni til stórliðs í ensku úrvalsdeildinni en hann átti frábært tímabil með Benfica.

Það eru fleiri ungir og öflugir leikmenn í hópnum. Það má má nefna tvo 22 ára stráka, Ruben Dias, miðvörð Benfica og Goncalo Guedes, framherja Valencia. Þá verða Bruno Fernandes, miðjumaður Sporting Lisbon og Bernardo Silva hjá Manchester City einnig í stórum hlutverkum. Þeir eru bara 24 ára gamlir.





„Við vitum að Bernardo Silva er næsta stórstjarna liðsins og leikmaður sem getur haldið í við Ronaldo. Felix mun síðan koma upp á næstu árum en hann er mjög hæfileikaríkur leikmaður,“ sagði Carvalhal.

Carlos Carvalhal segir að egóið sé ekki eins mikið innan liðsins og hugarfarið sé öðruvísi og líklegra til afreka.

„Allir þessir leikmenn fá okkur til að trúa því að við verðum með mjög gott landslið næstu tíu árin. Við höfum örugglega svipaða tilfinningu og Englendingar og Hollendingar sem eru líka með mikið af ungum framtíðarmönnum,“ sagði Carvalhal.

Það má finna meira um vangaveltur þeirra um portúgalska landsliðið með því að smella hér.





Evrópudeild UEFA

Mest lesið


Fleiri fréttir

Sjá meira


×

Mest lesið