Gengi Bitcoin í hæstu hæðum

Gengi rafmyntarinnar Bitcoin er nú það hæsta sem það hefur verið í fimmtán mánuði en gengið fór upp um tíu prósent um helgina.

Ein Bitcoin jafngildir nú tæplega 11 þúsund Bandaríkjadölum.

Sérfræðingar telja að þessa miklu hækkun megi rekja til aukinnar bjartsýni varðandi rafmyntir í kjölfar þess að Facebook kynnti rafmynt sína Libru í liðinni viku.

Í frétt Reuters um málið er rætt við sérfræðinginn Mati Greenspan. Hann segir að hækkun á gengi Bitcoin nú sýni að fjárfestar telji áform Facebook um sinn eigin rafgjaldmiðil vísbendingu um að fleiri stórfyrirtæki taki upp rafmyntir.

„Þeir trúa því að Libran muni gera almenning meðvitaðri um málið og sjá þetta sem hliðið sem muni opna á möguleikann að taka upp rafmyntir,“ segir Greenspan.

Aðrir sérfræðingar tengja hækkunina við tollastríð Bandaríkjanna og Kína og segja fjárfesta líta til Bitcoin sem nokkurs konar varnar gegn hruni hefðbundinna gjaldmiðla.