Spá allt að 20 stiga hita á austanverðu landinu

Vestlæg átt verður ríkjandi á landinu frá og með sunnudegi og fram í næstu viku. Hlýr loftmassi færist yfir landið og verður þá bjart og hlýtt á austanverðu landinu.

Þetta kemur fram í hugleiðingum veðurfræðings á vef Veðurstofu Íslands en þar segir að tími sé til kominn að hlýni austan til enda hefur verið sólarlítið þar það sem af er sumri og hitinn með lægra móti.

„Vestan lands verður meira og minna skýjað og einhver væta eftir helgi. Sú væta er líkleg til að vera á formi súldar og ekki rigning nema að litlu leyti. Ekki er víst að úrkomumagnið verði nægjanlegt til að bleyta almennilega í þurrum gróðri eða hressa upp á vatnslitlar laxveiðiár,“ segir á vef Veðurstofunnar.

Í dag má svo búast við skúrum í flestum landshlutum en síst þó vestast á landinu. Hitinn verður á bilinu 7 til 16 stig, hlýjast á Suðurlandi.

Á morgun verður svo bjart með köflum og yfirleitt þurrt. Búast má við rigningu austan lands framan af morgundegi og dálítið svalara veðri en það rofar til seinnipartinn. Hitinn verður á bilinu 10 til 17 stig.

Veðurhorfur á landinu:

Norðan og norðvestan 3-8 m/s. Skúrir í flestum landshlutum í dag, síst þó vestast á landinu. Hiti 7 til 16 stig, hlýjast á Suðurlandi.

Vestan 3-8 á morgun, bjart með köflum og yfirleitt þurrt. Hiti 10 til 17 stig. Norðlægari og svolítil rigning austanlands framan af degi og svalara, en rofar til þar seinnipartinn.

Á sunnudag og mánudag:

Suðvestan 5-10 og víða léttskýjað, en skýjað að mestu vestanlands. Hiti 11 til 19 stig, hlýjast um landið austanvert.

Á þriðjudag og miðvikudag:

Ákveðin vestanátt. Skýjað á vesturhelmingi landsins og dálítil rigning eða súld af og til. Hiti 10 til 14 stig. Bjartviðri austantil með hita 15 til 20 stig.

Á fimmtudag:

Vestanátt framan af degi en gengur í norðan 5-10 síðdegis. Líkur á dálítilli rigningu eða súld í flestum landshlutum. Kólnandi veður.