„Hann féll hraðar en honum var hrint“

Donald Trump, forseti Bandaríkjanna, telur mögulegt að 75 ára gamall maður sem slasaðist alvarlega þegar lögregluþjónar hrintu honum í jörðina í Buffaloborg sé útsendari Antifa og að um sviðsetningu hafi verið að ræða. Þessu sjónarhorni sínu tísti forsetinn í dag eftir að hann horfði á frétt hins umdeilda og mjög svo hægri sinnaða fjölmiðils One America News Network eða OANN.

„Hinum 75 ára gamla Martin Gugino var hrint eftir að hann virtist skanna samskiptabúnað lögregluþjóna með því markmiði að slökkva á búnaðinum. @OANN ég horfði, hann féll hraðar en honum var hrint. Var að miða skanna. Gæti verið sviðsett?“ skrifaði Trump.

Tveimur lögregluþjónum var vikið úr starfi vegna atviksins og voru þeir svo ákærðir fyrir líkamsárás. Gugino slasaðist alvarlega í atvikinu og er enn á sjúkrahúsi. Í fyrstu hélt lögreglan því fram að hann hefði hrasað og dottið. Aðrir lögregluþjónar sem voru einnig í sérstakri óeirðasveit, hættu í sveitinni til stuðnings við félaga sína.

Trump hefur meðal annars hótað því að skilgreina Anitfa sem hryðjuverkasamtök, þó hann geti það ekki samkvæmt lögum.

Umfjöllun OANN byggir á vangaveltum í bloggfærslu á síðu sem kallast Conservative Tree House.

Lögmaður Gugino sagði í síðustu viku að hann væri friðsamur aðgerðasinni, hefði verið það um árabil og hann berjist fyrir mannréttindum.

Myndband af því þegar Gugino var hrint má sjá í fréttinni hér að neðan.

Héraðsmiðillinn WKBW hefur eftir lögmanni Gugino að hún hafi ekki hugmynd um hvaðan þessar ásakanir komi. Það sé alger óþarfi að saka fólk um að vera eitthvað sem þau eru ekki. Þá vildi lögreglustjórinn í Buffalo, þar sem Gugino var hrint, ekki tjá sig um tíst forsetans.

Í umfjöllun OANN er því haldið fram að fjölmiðlar í Bandaríkjunum kyndi undir elda óstöðugleika í Bandaríkjunum og séu í herferð gegn „helsta bandamanni bandarískra lögregluþjóna, Donald Trump“. Þetta hagnist eingöngu Kínverjum og Joe Biden, mótframbjóðanda Trump.

Sjá einnig: Framboð Trump í miklum vandræðum

Bloggfærslan sem umfjöllun OANN og tíst forseta Bandaríkjanna byggja á er skrifuð af nafnlausum aðila. Síðan sjálf er skráð af fyrirtæki sem felur raunverulegan eiganda hennar.

Þar er stungið upp á því að Gugino sé að nota búnað í síma sínum sem geti skannað og slökkt á samskiptabúnaði lögregluþjóna. Það er sagt vera algeng aðferð Antifa, sem er hreyfing rótækra and-fasista sem Trump hefur sakað um ofbeldi í tengslum við mótmæli vegna dauða George Floyd.

Í bloggfærslunni eru litlar sem engar sannanir færðar fyrir því að Gugino hafi verið að reyna að skanna samskiptabúnað lögreglunnar á nokkurn hátt, að öðru leyti en að hann var með síma í hendinni og færði höndina í átt að lögregluþjónunum sem hrintu honum. Þá eru sömuleiðis engar sannanir færðar fyrir því að hann aðhyllist Antifa.

Þá er frétt OANN sjálf unnin af rússneskum fréttamanni sem vinnur einnig fyrir Sputnik, rússneskan miðil sem er í eigur rússneska ríkisins. Leyniþjónustur Bandaríkjanna segja Sputnik hafa verið notaðan til áhrifaherferðar yfirvalda Rússlands gagnvart forsetakosningunum 2016.

OANN hefur flutt margar umfjallanir um samsæriskenningar sem snúa að Hillary Clinton og George Soros, sem er vinsælt skotmark fjar-hægri afla. Miðillinn hefur sömuleiðis fjallað um að nýja kóróunveiran hafi verið þróuð á tilraunastofu í Bandaríkjunum.