Hólmbert tryggði Álasund fyrsta stig tímabilsins | Emil lét reka sig út af

Þó nokkrir Íslendingar voru í eldlínunni í norsku úrvalsdeildinni í dag. Hjá Álasund var Daníel Leó Grétarsson eini Íslendingurinn í byrjunarliðinu er liðið fékk Brann í heimsókn. Þeir Davíð Kristján Ólafsson og Hólmbert Aron Friðjónsson hófu leikinn á bekknum.

Hólmbert Aron kom af bekknum þegar staðan var orðin 2-1 fyrir Brann. Skömmu síðar kom Davíð Kristján einnig inn á og í kjölfarið hafði Álasund jafnað metin. Markið gerði Hólmbert eftir sendingu Niklas Castro.

Lokatölur 2-2 og fyrsta stig Álasund á tímabilinu komið í hús. Liðið er nú með eitt stig þegar þremur umferðum er lokið.

Hjá Sandefjörd var Emil Pálsson í byrjunarliðinu er liðið heimsótti Stabæk en Viðar Ari Jónsson hóf leikinn á bekknum. Staðan var 1-0 Stabæk í vil í hálfleik og var Viðar Ari sendur inn á er gestirnir gerðu þrefalda breytingu.

Á 48. mínútu fékk Emil gult spjald og aðeins tíu mínútum síðar braut miðjumaðurinn hárprúði aftur af sér og fékk sitt annað gula spjald í leiknum og þar með rautt. Sandefjörd tókst ekki að jafna metin enda manni færri og undir lok leiks tvöfaldaði Hugo Vetlesen forystu Stabæk og þar við sat.

Lokatölur 2-0 fyrir Stabæk. Var þetta fyrsti leikurinn sem Sandefjörd tapar á tímabilinu en áður hafði liðið unnið einn og gert eitt jafntefli. Liðið er því með fjögur stig þegar þremur umferðum er lokið.

Kjartan Henry Finnbogason var í byrjunarliði Vejle sem gerði 1-1 jafntefli við Næstved IF á útivelli í dönsku B-deildinni. Vejle er sem fyrr á toppi deildarinnar en liðið er með átta stiga forystu á Viborg sem er í 2. sæti þegar sjö umferðir eru eftir.