Ótrúleg saga samherja Andra Fannars hjá Bologna | Skoraði gegn Inter um helgina

Bologna vann óvænt 2-1 sigur gegn Inter Milan í ítölsku úrvalsdeildinni um nýliðna helgi. Íslendingurinn Andri Fannar Baldursson kom inn af varamannabekk liðsins undir lok leiks en það var annar táningur í herbúðum Bologna sem stal senunni.

Musa Juwara er 18 ára gamall drengur frá Gambíu. Hann jafnaði leikinn á 75. mínútu, aðeins tíu mínútum eftir að hann kom inn af varamannabekknum. Var þetta hans fyrsta mark sem atvinnumaður. Musa Barrow skoraði svo sigurmark Bologna þegar tíu mínútur voru til leiksloka.

Juwara flúði slæmar aðstæður þar í landi árið 2016 og komst til Ítalíu með bát yfir Miðjarðarhafið. Hann er einn af þeim heppnu sem komst yfir en því miður gera það ekki allir sem leggja í þessa ferð sem lifa það af.

Fékk hann síðan tækifæri hjá áhugamannaliðinu Virtus Avigliano. Gerðist þjálfari liðsins, Vitantonio Summa, forráðamaður Juwara þar sem hann fór einn síns liðs frá Gambíu til Ítalíu.

Frammistaða Juwara með Avigliano var ekki lengi að vekja athygli út fyrir borgarmörkin. Leikmaðurinn þykir einkar öflugur kantmaður miðað við aldur og eins og hendi væri veifað þá var Chievo Verona búið að hafa samband með það í huga að semja við drenginn.

Gekk hann í raðir liðsins árið 2017. Var aðdragandi félagaskiptanna nokkuð langur en í fyrstu mátti hann ekki semja við félagið sökum þess að hann væri flóttamaður í landinu. Eftir að hafa áfrýjað því máli fékk Juwara grænt ljóst á félagaskiptin og gerðist leikmaður Chievo.

Eftir óvænt lán til Torino á síðasta ári – til að taka þátt í hinu virta Torneo di Viareggio unglingamóti, þar sem Juwara skoraði þrjú mörk í þremur leikjum – þá fékk hann sénsinn í aðalliði Chievo er liðið spilaði við Frosinone Calcio í maí á síðasta ári.

Hann gekk svo í raðir Bologna síðasta sumar. Þar hitti hann Andra Fannar í U19 ára liði félagsins en fljótlega voru þeir félagar komnir í aðalliðshópinn undir styrkri stjórn Serbans Siniša Mihajlović. Þeir komu svo báðir við sögu hjá aðalliði Bologna í febrúar síðastliðnum.

Juwara kom inn af bekknum gegn Roma og Andri Fannar gegn Udinese. Juwara hafði þá þegar leikið gegn Udinese í ítölsku bikarkeppninni. Báðir komu svo inn af bekknum þegar Bologna kom til baka gegn Inter Milan um helgina og gerði þar með endanlega út um allar vonir að blanda sér í baráttuna um ítalska meistaratitilinn.

Andri Fannar verður að öllum líkindum áfram í herbúðum Bologna á næstu leiktíð og eru samningaviðræðræður nú þegar farnar af stað.

„Bologna vill gera langtíma samning við mig og samningaviðræður eru í gangi núna. Ég ætla bara að halda afram að standa mig á æfingum og sýna hvað ég get og þá vonandi fæ ég fleiri tækifæri. En þetta er auðvitað geggjað að vera partur af þessu liði. Ég er stoltur en ég er hungraður í miklu meira,“ sagði Andri Fannar í samtali við RÚV á dögunum.

Bologna er í 9. sæti ítölsku úrvalsdeildarinnar með 41 stig þegar átta umferðir eru eftir. Liðið er sjö stigum frá Napoli sem situr í 6. sætinu en það gefur þátttökurétt í Evrópudeildinni á næstu leiktíð.

Ítalska deildin er sýnd á Stöð 2 Sport og vonandi sjáum við meira af Andra í komandi leikjum.