Sunna Ósk til Kjarnans

Sunna Ósk Logadóttir fréttamaður hefur verið ráðin til Kjarnans og hefur nú þegar hafið störf.

Í frétt á vef Kjarnans kemur fram að Sunna Ósk hafi unnið við blaðamennsku í yfir tuttugu ár, en hún hóf störf hjá Morgunblaðinu árið 1999. Gegndi hún stöðu fréttastjóra á blaðinu á árunum 2008 til 2012 og svo fréttastjóra á mbl.is til ársins 2016.

Sunna Ósk er landfræðingur að mennt og hefur mikið skrifað um umhverfismál. Hún hefur þrívegis hlotið Blaðamannaverðlaun Íslands – fyrir skrif um Landspítalann árið 2005, málefni flóttamanna árið 2015 og svo nýtingu náttúruauðlinda árið 2017.

Viðskiptablaðið greindi frá því í gær að Magnús Halldórsson, einn stofnenda Kjarnans, ætlaði að yfirgefa miðilinn á næstunni.