Guðjón Valur með 24 marka forskot fram að næsta Evrópumóti

Guðjón Valur Sigurðsson er markahæsti leikmaður Evrópumóts karla frá upphafi en hann bætti við átján mörkum á Evrópumótinu í Svíþjóð, Noregi og Austurríki sem lauk um helgina.

Guðjón Valur hefur bæði spilað meira og skorað á hinum tíu Evrópumótunum sínum en það góða við þetta mót er að forskot íslenska landsliðsfyrirliðans á toppnum minnkaði ekki.

Guðjón Valur Sigurðsson náði nefnilega að auka forskot sitt á Frakkann Nikola Karabatic um tíu mörk á þessu móti. Þar hjálpaði til að Nikola Karabatic og félagar hans í franska landsliðinu komust ekki upp úr sínum riðli.

Nikola Karabatic er nú 24 mörkum á eftir Guðjóni Val. Eftir tvö ár þegar Evrópumótið fer næst fram þá verður Nikola Karabatic orðinn 37 ára gamall en ef hann spilar jafnlengi og íslenski landsliðsfyrirliðinn þá á hann tvö Evrópumót eftir. Gengi Frakka á EM voru hins vegar mikil vonbrigði og svo gæti farið að þeir fari að byggja til framtíðar og kalli ekki á Karabatic eftir tvö ár.

Mikkel Hansen var líka líklegur til að nálgast Guðjón Val miklu meira en hann gerði. Hansen skoraði hins vegar aðeins einu marki meira en Guðjón Valur þar sem Danir duttu út í riðlakeppninni. Kiril Lazarov sem var farinn að nálgast tvö hundruð marka múrinn fékk líka aðeins þrjá leiki því Norður-Makedónía komst ekki áfram upp úr sínum riðli.

Norðmaðurinn Sandor Sagosen varð markakóngur EM með 65 mörk. Hann hefur þar með skorað 128 mörk samtals á sínum Evrópumótum og þar sem hann er enn bara 24 ára gamall þá ætti hann að geta átt fimm til sex góð Evrópumót eftir. Sandor Sagosen er því í dag sá sem er líklegastur til að ná Guðjóni.

Markahæstu leikmenn EM í handbolta karla frá upphafi:

1. Guðjón Valur Sigurðsson 288

2. Nikola Karabatic 264

3. Mikkel Hansen  213

4. Stefan Löwgren 203

5. Ólafur Stefánsson 184

6. Kiril Lazarov 182