Aðeins þrír skjálftar frá miðnætti

Dregið hefur úr skjálftavirkni í grennd við Grindavík en þrír skjálftar hafa mælst þar frá miðnætti, allir undir tveimur að stærð. Nýjasta GPS-úrvinnsla sýnir áframhaldandi landris á svæðinu vestan við fjallið Þorbjörn. Í heildina hefur land risið um fimm sentimetra frá 20. janúar síðastliðnum, að því er fram kemur á vef Veðurstofunnar. Gervitunglamyndir sýna sömu þróun.

Tæplega sextíu jarðskjálftar mældust á svæðinu í gær og flestir undir tveimur að stærð. Sólarhringsvakt Veðurstofunnar fylgist áfram með virkni á svæðinu.

Frá 21. janúar hafa yfir 1300 skjálftar verið staðsettir á svæðinu, flestir í SV/NA-stefnu um tvo kílómetra norðaustur af Grindavík.

Með landrisi má jafnframt búast við áframhaldandi jarðskjálftavirkni. Líklegasta skýring þessarar virkni er kvikuinnskot á þriggja til níu kílómetra dýpi rétt vestan við Þorbjörn. Líklegast er að virknin ljúki án eldsumbrota.

Næsti fundur vísindaráðs Almannavarna verður haldinn fimmtudaginn 6. febrúar þar sem farið verður yfir stöðuna við Grindavík.