Níu ára bið gæti endað í kvöld: „Liðið mitt þurfti á Evrópudeildinni að halda“

Stuðningsmenn Nerazzurri liðsins frá Mílanóborg dreymir um langþráðan sigur í kvöld en Antonio Conte á möguleika að gera Inter að Evrópumeisturum sem Jose Mourinho gerði síðasta með svo eftirminnilegum hætti fyrir áratug síðan.

Úrslitaleikur Evrópudeildarinnar fer fram í kvöld á RheinEnergie Stadion í Köln þar sem spænska félagið Sevilla mætir Internazionale frá Ítalíu. Leikurinn hefst klukkan 19.00 og verður í beinni útsendingu á Stöð 2 Sport 2.

Augu margra verða á knattspyrnustjóranum Antonio Conte og svo fyrrum Manchester United mönnunum Romelu Lukaku, Alexis Sánchez og Ashley Young sem ekki var pláss fyrir á Old Trafford. Það varð ekkert að úrslitaleiknum á móti Manchester United en allir eiga þeir möguleika á að vinna titil sem kollegum þeirra hjá United tókst ekki.

Alexis Sánchez hefur náð sér aftur á strik hjá Inter en það er frammistaða Romelu Lukaku sem hefur stolið flestum fyrirsögnunum. Romelu Lukaku er kominn með 33 mörk á sínu fyrsta tímabili með Inter þar af 6 mörk í 5 leikjum í Evrópudeildinni.

Sevilla liðið hefur verið konungur Evrópudeildarinnar undanfarin ár en er spænska félagið búið að vinna hana fimm sinnum frá árinu 2006 þar af þrjú ár í röð frá 2014 til 2016. Sá síðasti kom í hús eftir 3-1 sigur á Liverpool í úrslitaleiknum.

Julen Lopetegui, knattspyrnustjóri Sevilla, á aftur á móti enn eftir að vinna titil á sínum ferli. Hann er einna frægastur fyrir það að missa landsliðsþjálfarastarfið nokkrum dögum fyrir HM 2018 eftir að hafa samið um að taka við Real Madrid eftir mótið. Lopetegui entist síðan bara fram í október hjá Real.

Það er því ekkert skrýtið að ítalska stórblaðið Gazzetta Dello Sport slái því upp á forsíðu sinni að Antonio Conte ætli sér að bregða sér í hlutverk Jose Mourinho eins og sjá má hér fyrir neðan.

Stuðningsmenn Internazionale eru ekki búnir að gleyma þrennutímabili félagsins undir stjórn Jose Mourinho 2009-10 en portúgalski stjórinn kvaddi strax í kjölfarið og tók við Real Madrid. Inter kom þá mörgum á óvart með því að vinna Meistaradeildina eftir að hafa unnið bæði ítölsku deildina og bikarinn.

Úrslitaleikurinn var á móti Bayern München og var spilaður á Santiago Bernabéu, heimavelli Real Madrid. Inter vann leikinn 2-0 en í miðri gleðivímu stuðningsmanna Nerazzurri þá misstu þeir stjórann sinn.

Liðið vann reyndar ítalska bikarinn undir stjórn Leonardo árið eftir en hefur ekki unnið titil á þeim níu árum sem eru liðin síðan.

„Þetta hefur verið jákvætt tímabil. Við höfum náð mikilvægum áföngum og höfðum bætt okkur mikið. Okkur tókst að komast í úrslitaleik Evrópudeildarinnar eftir vonbrigðin að komast ekki upp úr riðlakeppni Meistaradeildarinnar,“ sagði Antonio Conte, knattspyrnustjóri Inter.

„Það gaf okkur tækifæri að upplifa árangursríkara ferðalag en við höfðum getað í Meistaradeildinni. Okkar lið, sem er með fullt af ungum og reynslulitlum leikmönnum, þurfti á því að halda,“ sagði Antonio Conte. Hann tók við liði Inter fyrir þetta tímabil og náði öðru sætinu í Seríu A.

„Þetta verður erfiður leikur. Við erum að fara að mæta liði sem hefur mikla reynslu og er það lið sem hefur unnið flesta titla í þessari keppni á síðustu árum. Við verðum að passa okkur á þeim en við verðum líka að vera áræðnir og hugrakkir með því að spila okkar leik eins og við höfum gert hingað til. Þetta er úrslitaleikur og aðeins bestu liðin komast þangað,“ sagði Antonio Conte.