LeBron sá sigur­sælasti í úr­slita­keppni NBA

LeBron James varð í nótt sigursælasti leikmaður úrslitakeppni NBA er LA Lakers vann tíu stiga sigur á Houston, 112-102.'

Þetta varð sigur númer 162 hjá LeBron í úrslitakeppninni í Bandaríkjunum og tók hann því fram úr Derek Fisher sem er í 2. sætinu með 161 sigurleik.

LeBron hafði heldur betur ekki hægt um sig í nótt en hann skoraði 36 stig í leiknum. 29 stig af þeim 36 sem hann gerði komu í fyrri hálfleik þar sem hann lék á alls oddi.

James Harden var stigahæstur Houston-manna með 33 stig.

Lakers er þar af leiðandi komið í 2-1 í undanúrslitaeinvíginu.

Í hinum leik næturinnar tryggði Miami sér sæti í úrslitum austurdeildarinnar eftir 103-94 sigur á Milwaukee Bucks.

Jimmy Butler og Goran Dragic gerðu sautján stig hvor en Khris Middleton var stigahæstur Bucks með 23 stig.