Steven Lennon, framherji FH, hefur leikið á alls oddi í liði FH á leiktíðinni og er spenntur fyrir stórleik dagsins gegn Breiðablik í Pepsi Max deildinni.
Lennon hefur skorað ellefu deildarmörk í jafn mörgum leikjum og hefur bætt við tveimur í bikarnum, þar á meðal einu gegn Stjörnunni í átta liða úrslitunum fyrr í vikunni.
„Þetta var góður sigur. Það er alltaf gaman að komast áfram í bikarnum og alltaf gaman að vinna Stjörnuna sem er einn okkar helsti erkióvinur,“ sagði Lennon í samtali við Guðmund Hilmarsson á fésbókarsíðu FH.
„Þetta var góð liðsframmistaða og vonandi getum við byggt á þessu í deildinni. Það eru margir stórir leikir framundan og vonum að þetta geti haldið svona áfram.“
Hann setti síðan nokkur orð á stórleikinn gegn Breiðabliki í dag.
„Þetta er skyldusigur ef við ætlum að berjast um titilinn. Það eru leikir framundan gegn Víkingi og Val einnig og við verðum að vinna þessa leiki ef við viljum setja pressu á Val. Mjög mikilvægur leikur.“
„Þetta ætti að vera svipað og vanalega; skemmtun og mörk. Breiðablik vill spila út frá markinu svo ef við erum ákafir og reynum að taka yfir miðjuna, eins og við gerðum gegn Stjörnunni, þá ætti það að skila árangri.“
En er þetta besta tímabil Lennon á Íslandi?
„Ég myndi segja það markalega séð. Ég er ekki að gera neitt öðruvísi en núna get ég hlaupið aðeins betur því ég hef ekkert verið meiddur í ár. Ég hef verið smá meiddur síðustu ár.“
„Varðandi mörkin þá þarftu að hafa smá heppni með þér í liði og þetta er að falla fyrir mig. Vonandi heldur það þannig út leiktíðina,“ sagði Lennon.
Leikur FH og Breiðabliks hefst klukkan 16.30 og verður í beinni útsendingu á Stöð 2 Sport.
