Kári verður klár í Rúmeníuleikinn

Kári Árnason segir allar líkur á því að hann verði klár í slaginn fyrir leikinn mikilvæga gegn Rúmeníu um sæti á EM 8. október.

Kári meiddist í nára í leik Fylkis og Víkings á fimmtudaginn og var tekinn af velli skömmu fyrir lok fyrri hálfleiks. Hann lék svo ekki með Víkingum gegn Skagamönnum á sunnudaginn.

Kári segir afar ólíklegt að hann nái leik Víkings og KR annað kvöld en vonast til að geta spilað gegn KA á sunnudaginn. Hann muni þó ekki taka neina óþarfa áhættu.

„Ég er mjög tæpur fyrir KR-leikinn en ég er að vonast til að geta náð KA-leiknum. Og ég er alveg hundrað prósent klár í þennan landsleik. Sama þótt ég verði ekki klár verð ég klár,“ sagði Kári hlæjandi í samtali við Vísi í dag.

„Það er góður framgangur í þessu og ég tel fátt því til fyrirstöðu að ég spili gegn KA nema það sé of mikil áhætta fyrir þennan fjögurra milljarða króna leik.“

Ísland á þrjá heimaleiki í næstu landsleikjatörn, gegn Rúmeníu í umspilinu 8. október og Danmörku og Belgíu í Þjóðadeildinni 11. og 14. október.

Kári hefur leikið tólf leiki fyrir Víking í Pepsi Max-deildinni í sumar. Liðið er í 10. sæti með sextán stig.