Fyrir­liðinn fer í janúar: Atalanta ævin­týrið á enda?

Atalanta er sem stendur í 9. sæti Serie A, ítölsku úrvalsdeildarinnar, með 17 stig að loknum tíu leikjum. Liðið er tíu stigum á eftir toppliði AC Milan en á þó leik til góða á öll liðin fyrir ofan sig í töflunni.

Sigur í kvöld gegn Juventus sem og í leiknum sem Atalanta á til góða og liðið er jafnt Ítalíumeisturum Juve að stigum. Þá er liðið komið í 16-liða úrslit Meistaradeildar Evrópu þar sem Real Madrid bíður. Ef til vill er því full hart að tala um krísu og að ævintýrið sé búið.

Þannig er nú samt smá stemningin í félaginu að svo stöddu. Fyrirliði félagsins lenti upp á kant við Gian Piero Gasperini, þjálfara Atalanta, og ætlar sá fyrrnefndi að yfirgefa félagið í janúar. 

Rúmar tvær vikur eru síðan þeim tveimur lenti saman og morguninn áður en það var dregið í Meistaradeildinni nýtti Papu Gomez sér Instagram til að koma skilaboðum á framfæri.

„Ég er að skrifa til ykkar hér þar sem ég hef enga leið til að verja mig eða tala við ykkur. Þið vitið hvaða mann ég hef að geyma og sannleikurinn mun koma í ljós þegar ég fer. Þið þekkið mig. Þið vitið hver ég er. Ég elska ykkur. Kveðja, fyrirliðinn ykkar,“ sagði í færslu Papu.

Papu hefur mikilvægur hluti af uppgangi Atalanta. Hann er að vissu leyti sá sem bindur liðið saman og hefur lyft því upp í hæstu hæðir. Félagið er í 16-liða úrslitum Meistaradeildarinnar annað árið í röð, það var í toppbaráttu Serie A framan af síðasta tímabili og þá spilar liðið stórkostlegan fótbolta.

Ástæðan ku vera sú að Papu fór ekki eftir fyrirmælum Gasperini í leik gegn Midtjylland í Meistaradeildinni. Hann átti að færa sig út á væng en hélt áfram að spila fyrir miðju vallarins. Fyrirliðinn var tekinn út af í hálfleik og var ekki í byrjunarliðinu gegn Udinese í leiknum þar á eftir.

Fyrirliðinn sneri aftur í mikilvægum leik gegn Ajax í Meistaradeildinni þar sem sæti í 16-liða úrslitum var undir. Leikurinn vannst og Atalanta komst áfram. Fyrirliðinn var svo hvergi sjáanlegur í 3-0 sigri á Fiorentina skömmu síðar.

Atalanta heimsækir Allianz-völlinn í Tórínó-borg í dag og mæta þar Ítalíumeisturum Juventus. Lærisveinar Andrea Pirlo eru hægt og rólega að komast á ról eftir erfiða byrjun. Juve situr í 4. sæti með 23 stig að loknum 11 umferðum, þremur stigum á eftir AC Milan.

Leikur Juventus og Atalanta er í beinni útsendingu Stöðvar 2 Sport 2 klukkan 17.20 en leikurinn hefst tíu mínútum síðar.  Þá er leikur Inter Milan og Napoli – liðin í 2. og 3. sæti – í beinni útsendingu Stöðvar 2 Sport 4 klukkan 19.35.

Ítalski boltinn, Serie A, er á Stöð 2 Sport en upplýsingar um útsendingar má finna hér. Serie A er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.