Sandra spilar ekki með ÍBV: Búin að semja í Danmörku

Landsliðskonan í handbolta, Sandra Erlingsdóttir, mun ekki leika með ÍBV í vetur eins og stóð til en hún hefur samið við Álaborg í Danmörku.

Sandra skrifaði undir samning við uppeldisfélag sitt ÍBV nú á vormánuðum eftir að hafa leikið með Val undanfarin ár en í tilkynningu frá ÍBV segir að þegar Sandra hafi samið við ÍBV hafi verið ljóst að þessi staða gæti komið upp.

Sandra var að meðaltali með 4,9 mörk í Olís-deildinni í vetur auk þess að gefa þrjár stoðsendingar í leik.

Álaborg var á botni dönsku deildarinnar með einungis þrjá sigra í 23 leikjum er deildin var flautuð af.