Mourinho rifjaði upp eina skiptið þar sem hann grét eftir leik

Portúgalinn José Mourinho hefur verið einkar sigursæll á sínum ferli og unnið til fjölda titla, í Portúgal, á Englandi, Ítalíu og Spáni, en einnig mátt þola sár töp.

Mourinho segir í samtali við Marca að tapið sem hafi níst sárast sé frá því þegar hann stýrði Real Madrid. Liðið tapaði fyrir Bayern München í vítaspyrnukeppni í undanúrslitum Meistaradeildar Evrópu árið 2012, sama ár og Real setti stigamet í spænsku 1. deildinni. Mourinho hafði áður orðið Evrópumeistari sem stjóri Porto og Inter.

Þeir Cristiano Ronaldo, Kaka og Sergio Ramos klikkuðu hver um sig á sinni vítaspyrnu en með sigri hefði Mourinho mætt sínum gömlu lærisveinum í Chelsea í úrslitaleiknum. Chelsea varð Evrópumeistari með sigri á Bayern í vítaspyrnukeppni.

„Því miður þá er fótboltinn svona. Cristiano, Kaka, Sergio Ramos… þrír risar í fótboltanum, um það er ekki spurning, en þeir eru líka mannlegir,“ sagði Mourinho.

„Þetta kvöld er eina skiptið á ferli mínum sem þjálfari þar sem ég hef grátið eftir tap. Ég man þetta vel. Aitor [Karanka] og ég stoppuðum fyrir framan húsið mitt, í bílnum, grátandi. Þetta var gríðarlega erfitt vegna þess að við vorum besta liðið þetta ár,“ sagði Mourinho.