Brady á móti Brees í sögulegum leik um næstu helgi

Tvær lifandi goðsagnir á fimmtugsaldri hafa ekki sagt sitt síðasta í NFL-deildinni og úrslitin í gær þýða að við fáum innbyrðis leik milli þeirra Drew Brees og Tom Brady um næstu helgi.

Lið þeirra Tampa Bay Buccaneers og New Orleans Saints unnu nefnilega bæði sannfærandi sigra og úrslit í öðrum leikjum þýddu að leiðir þeirra liggja saman í New Orleans næstkomandi sunnudag.

Cleveland Browns, Buffalo Bills og Baltimore Ravens unnu líka öll langþráða sigra um helgina en öll liðin voru búin að bíða lengi eftir sigri í úrslitakeppninni. Baltimore Ravens reyndar styttra en hin en hafði klúðrað leikjum sínum í úrslitakeppni undanfarin ár þrátt fyrir að vera með frábært lið.

NFL-tímabilið er aftur á móti búið hjá Pittsburgh Steelers, Tennessee Titans, Indianapolis Colts, Seattle Seahawks, Washington Football Team og Chicago Bears.

New Orleans Saints vann öruggan 21-9 sigur á Chicago Bears á heimavelli sínum og fær því annan heimaleik á móti Tampa Bay Buccaneers. Buccaneers vann Washington á útivelli aðfaranótt sunnudagsins.

Drew Brees og Tom Brady verða þar elstu leikstjórnendurnir til að mætast í úrslitakeppni. Brees heldur upp á 42 ára afmælið sitt næstkomandi föstudag og Brady er 43 ára síðan í haust. Þeir eru báðir á leiðinni í Frægðarhöllina enda þeir tveir leikstjórnendur sem hafa gefið flestar snertimarkssendingar á ferlinum.

Drew Brees hefur unnið 5 af 7 leikjum sínum á móti Brady þar á meðal Súper Bowl leikinn fyrir ellefu árum sem er eini titill Brees á ferlinum. Tom Brady hefur aftur á móti unnið sex en alla með liði New England Patriots.

Cleveland Browns liðið var án þjálfara síns í sínum fyrsta leik í úrslitakeppninni í nítján ár en tók sig til og sló Pittsburgh Steelers úr leik.

Ben Roethlisberger og félagar í Pittsburgh Steelers unnu ellefu fyrstu leiki tímabilsins og voru síðasta liðið til að tapa á leiktíðinni. Tapið í gær voru hins vegar enn ein vonbrigðin á síðustu vikum enda liðið að tapa í fimmta sinn í síðustu sex leikjum.

Cleveland Browns hafði ekki spilað í úrslitakeppninni síðan 2002 og þjálfari liðsins, Kevin Stefanski, var heima hjá sér með kórónuveiruna. Browns lagði grunninn að sigrinum með því að komast í 28-0 og vann á endanum 48-37. Þetta var fyrsti sigur Cleveland Browns í úrslitakeppninni síðan árið 1994.

Baltimore Ravens vann 20-13 sigur á Tennessee Titans í fyrsta leik gærdagsins eftir að hafa lent 10-0 undir í upphafi leiks. Ravnes liðið hefndi þar með fyrir tapið á móti Titans í úrslitakeppninni fyrir ári síðan og Lamar Jackson vann sinn fyrsta sigur í úrslitakeppni.

Lamar Jackson skoraði eitt snertimark í leiknum eftir 48 jarda hlaup en það var mikil pressa á honum að vinna loksins leik í úrslitakeppni. Það tókst og næst á dagskrá er svakaleikur á móti sjóðheitu liði Buffalo Bills.

Hér fyrir neðan má sjá hvaða leikir bíða okkar á sportstöðvunum um næstu helgi þegar undanúrslit deildanna fara fram.