Krúnurökuðu sig til að sýna liðsfélaga með krabbamein stuðning

Dimitrij Küttel, leikmaður Kadetten Schaffhausen og svissneska landsliðsins, glímir nú við krabbamein. Hann er 26 ára.

Í leiknum gegn Rhein-Neckar Löwen í Evrópudeildinni í gær sást að nokkrir leikmenn Kadetten Schaffhausen höfðu krúnurakað sig til að sýna Küttel stuðning.

Svissneska landsliðið sýndi honum líka stuðning á HM í Egyptalandi í síðasta mánuði og ljóst er að félagar hans standa þétt við bakið á honum.

Aðalsteinn Eyjólfsson er þjálfari Kadetten Schaffhausen sem er stærsta liðið í Sviss og fastagestur í Evrópukeppnum.

Leik Kadetten Schaffhausen og Löwen í gær lyktaði með jafntefli, 30-30. Ýmir Örn Gíslason skoraði tvö mörk fyrir Ljónin og fékk auk þess rautt spjald undir lok leiks.

Löwen er á toppi D-riðils Evrópudeildarinnar með sjö stig. Kadetten Schaffhausen er í 3. sæti riðilsins með fjögur stig.