Segir móður­hlut­verkið hafa gert hana að betri leik­manni og stefnir á að verða fyrir­mynd fyrir mæður í í­þrótta­heiminum

Þá nefnir hún einnig æskuvin sinn Tómas Steindórsson í viðtlainu en hann ku vera aðalástæða þess að Dagný hefur stutt West Ham frá unga aldri.

Dagný er í einkar fámennum hópi leikmanna í ensku úrvalsdeildinni. Samkvæmt könnum, sem er þó orðin fjögurra ára gömul, er aðeins eitt prósent leikmanna deildarinnar mæður. 

Dagný ræðir umræðuna í kringum hana sem íþróttakonu eftir að í ljós kom að hún væri ólétt af synu sínum Brynjari í viðtalinu. Fólk lét eins og ferillinn væri einfaldlega búinn þó hún væri í raun á besta aldri.

„Haldið þið að ég verði ekki nægilega góð bara af því ég er að fara eignast barn? Það er heimskulegt. Af hverju ætti ég ekki að vera góð, af því ég er mamma? Bíðið bara og sjáið til,“ segir Dagný er hún lýsir viðbrögðum sínum við fáviskunni hér að ofan.

„Að verða móðir er það besta sem gat komið fyrir mig. Áður en ég varð ólétt taldi ég lífið einöngu snúast um fótbolta, svo eignaðist ég son og veit nú að lífið snýst um meira en fótbolta. Nú er það undir íþróttafélögum, fjölmiðlum og í raun öllum komið að sýna fram á að þú getir enn verið meðal bestu leikmanna í heimi.“

Stefnir á að vera fyrirmynd fyrir mæður

„Ég vil sýna sjálfri mér og öðrum að það er ekki byrði að vera móðir, það gefur þér svo mikið. Síðan ég varð mamma er ég betri leikmaður og betri liðsfélagi. Ég er rólegri og þó ég telji mig hafa verið almennilega áður þá er ég mun almennilegri núna. Einnig er ég mun þolinmóðari en áður.“

„Áður fyrr hugsaði ég um leiki þar sem ég spilaði illa eða tapaði í allt að þrjá daga. Nú hef ég ekki tíma til þess þegar ég kem heim þar sem mín bíður annað hlutverk þar.“

Endurkoman erfiðari en hún hélt

„Ég hélt þetta væri eins og að koma til baka eftir meiðsli en þetta var mun erfiðara en það. Það er mikil vinna á bakvið endurkomuna, líkamleg og andleg. Andlega var þetta erfitt því fólk sagði bara við mig að ég myndi aldrei spila geta spilað við þær bestu aftur og ætti bara að sætta mig við að spila á Íslandi.“

Dagný talaði vel um fyrrum félag sitt í Bandaríkjunum, Portland Thorns. Liðið framlengdi samning hennar þegar hún var ólétt og hjálpaði henni í endurkomunni en á endanum fannst henni það ekki fara saman að spila þar og vera með ungt barn heima.

„Það var of erfitt að vera í Bandaríkjunum því þau eru svo stór. Stundum var ég í burtu í tíu daga í einu. Upphaflega tók ég son minn með mér þegar hann var á brjósti en gat það ekki til lengdar. Það þýddi að ég væri mögulega frá honum í fleiri mánuði á ári.“

„Kvenkyns leikmenn fá ekki nægilega mikið borgað til að ég gæti tekið eiginmann minn og son með mér þegar við fórum í langar ferðir til að spila útileiki eða þá þegar ég var í landsliðsverkefnum. Ég hafði ekki efni á því að bóka flug, hótel og allt sem því fylgir fyrir okkur aftur og aftur.“

„Þó svo að ég elski fótbolta þá elska ég það meira að vera mamma svo ég var ekki tilbúin að eyða svona miklum tíma án sonar míns. Það er ástæðan fyrir því að ég kom aftur til Evrópu að spila.“

Greinin endar á að taka fram að Alþjóðaknattspyrnusambandið hafi sett ný lög er varðar réttindi óléttra leikmanna. Fari félög ekki eftir þeim reglum gætu þau verið sett í félagaskiptabann. 

Það er því aldrei að vita nema mun fleiri mömmur verði að spila í ensku úrvalsdeildinni áður en langt um líður.