Man City kláraði dæmið á fyrstu tuttugu mínútunum

Það tók Manchester City aðeins tuttugu mínútur að gulltryggja sæti sitt í 8-liða úrslitum Meistaradeildar Evrópu er Borussia Mönchengladbach kom til Búdapest og mætti lærisveinum Pep Guardiola. Þeir skoruðu tvisvar, unnu leikinn 2-0 og einvígið þar með 4-0.

Lærisveinar Pep Guardiola voru 2-0 yfir eftir þægilegan sigur í Þýskalandi og kláruðu þeir einvígið einfaldlega á fyrstu 20 mínútum leiksins í kvöld.

Strax á tólftu mínútu fékk Kevin De Bruyne sendingu frá Riyad Mahrez hægra megin við D-bog vítateigs Gladbach. De Bruyne lagði knöttinn fyrir sig og þrumaði honum svo í slá og inn. Óverjandi fyrir Yann Sommer í marki gestanna.

Aðeins sex mínútum síðar gerðu heimamenn út um einvígið með stórkostlegu marki sem á heima í kennslubókum. John Stones fann þá Phil Foden inn á miðjunni. Foden keyrði að marki, þegar hann nálgaðist vítateig Gladbach þá renndi hann boltanum til hægri á İlkay Gündoğan sem kláraði færið af stakri snilld.

Í aðeins tveimur sendingum – með frábæru hlaupi Foden – þá fóru City í gegnum lið Gladbach eins og heitur hnífur í gegnum smjör.

Staðan orðin 2-0 og reyndust það lokatölur kvöldsins. Einkar þægilegur sigur City sem vinnur einvígið 4-0 og er komið áfram í 8-liða úrslit Meistaradeildar Evrópu ásamt Real Madrid, Paris Saint-Germain, Liverpool, Porto og Borussia Dortmund. 

Á morgun kemur í ljós hvort Chelsea, Atlético Madrid, Lazio eða Bayern München fylgi hinum sex liðunum í 8-liða úrslit. Það verður svo dregið í umrætt 8-liða úrslit á föstudaginn kemur.