Marta segir Gísla Martein fyrrverandi prinsessu flokksins nú prinsessu RÚV

Ljóst er að verulegt óþol hefur gripið um sig innan Sjálfstæðisflokksins en svo virðist sem Gísli Marteinn fari mjög fyrir brjóstið á fyrrum félögum sínum í Sjálfstæðisflokknum en Gísli Marteinn var einmitt borgarfulltrúi flokksins á sínum tíma. Því er það svo að Marta ávarpar hann afar kumpánlega; Þú hefur verið óvenju drjúgur með þig þessa dagana, pjakkurinn þinn, og er þá mikið sagt.“

Segir Gísla Martein fara með ítrekuð ósannindi

Það sem einkum stendur í Sjálfstæðismönnum er málflutningur Gísla Marteins í skipulagsmálum vestur í bæ hvar hann rekur kaffihús og býr. Marta segir að tvær afbrags konur úr Sjálfstæðisflokknum, þær Þórdís Pálsdóttir og Ragnhildur Alda Vilhjálmsdóttir, hafi svarað „ósannindum“ hans. Og nú sjái hún sig knúna til að bætast í þann hóp. Mörtu var nefnilega brugðið þegar hún heyrði viðtal við Gísla í útvarpsþættinum Bakarínu.

Marta segir að Gísli Marteinn hafi ítrekað orðið uppvís af ósannindum. Að Sjálfstæðismenn séu á móti því að ökuhraði í hverfum borgarinnar verði lækkaður, að Sjálfstæðisflokkurinn berjist fyrir auknum ökuhraða þar og að þeir séu á móti þeirri þróun að fólk siti „úti við á bekkjum í boði Reykjavíkurborgar, drekki þar bjór og kaffi í boði Kaffi Vest, borði þar í boði Brauð og Co og Hagavagnsins, spjalli saman, umferðaröryggi aukist, hávaða- og umferðarmengun minnki og að mannlíf verði margfalt meira. […] Allt eru þetta rakalaus og vísvitandi ósannindi, haldið fram í flokkáróðursskyni, ekki óviljandi rangfærslur.“

Áður prinsessa flokksins nú prinsessa RÚV

Marta segir að þetta viti Gísli vel því hann var í þeirra röðum, þegar það hentaði hans hagsmunum. Nú sé honum, þegar allt kemur til alls, í raun aðeins illa við eina grasrót í einum flokki. Og hvers vegna?

„jú. Þú varst ein af prinsessum Sjálfstæðisflokksins og RÚV. En nú ert þú bara prinsessa RÚV. Þú varst frjálshyggjumaður, komst þér í mjúkinn hjá valdamiklum sem og velstæðum sjálfstæðismönnum og vildir verða borgarstjóri fyrir Sjálfstæðisflokkinn, keyptir ómæld gallon af bjór og tonn af pitsum sem þú útdeildir eins og rómverskur keisari - en, en, en þú tapaðir samt í fjölmennasta prófkjöri Sjálfstæðisflokksins, fyrr og síðar, fyrir grasrót flokksins í Reykjavík, árið 2006. Þess vegna er þér meinilla við þessa grasrót,“ skrifar Marta.

Marta rifjar upp að Gísli hafi verið við nám í Edinborg á sama tíma og hann var borgarfulltrúi Sjálfstæðisflokksins. Og skorar þá hann á að sleppa lausum pirringi frá árinu 2006. En hann skuli ekki láta sér til hugar koma að Sjálfstæðismenn í Reykjavík leggi upp laupana. „Ekki einu sinni fyrir tilstilli prinsessunnar á bauninni, hvort sem það ert nú þú eða aðrar álíka.“