„Agla María og Áslaug Munda gera útslagið“

Liðin sem barist hafa um Íslandsmeistaratitilinn síðustu ár, Valur og Breiðablik, mætast í undanúrslitum Mjólkurbikars kvenna á Kópavogsvelli í kvöld. Vegleg útsending frá leiknum verður á Stöð 2 Sport þar sem Gummi Ben lýsir og Helena Ólafsdóttir verður með landsliðsþjálfarann Þorstein Halldórsson sér til fulltingis niðri á velli fyrir og eftir leik.

Síðast þegar liðin mættust vann Breiðablik ótrúlegan 7-3 sigur. Eins og Mist bendir á hefur fyrirsjáanleikinn verið nánast enginn á þessu knattspyrnusumri og þó að liðin séu efst í Pepsi Max-deildinni hafa þau sýnt harla lítinn stöðugleika svo allt virðist geta gerst í kvöld:

„Ég held þó að Blikar vinni aftur en ég held að þetta verði frekar „venjulegur“ fótboltaleikur í þetta sinn. Þetta gæti farið 2-0 eða 2-1. Blikaliðið nær að gíra sig betur upp í þessa stóru leiki, er brútalt og vægðarlaust. Þó að Valskonur gefi þeim hörkuleik þá verða það aftur Agla María og Áslaug Munda sem gera útslagið,“ segir Mist, sérfræðingur Pepsi Max markanna.

Sjaldséð bræði Elínar Mettu og Ásdís Karen einnig í banni

Valur er án Elínar Mettu Jensen og Ásdísar Karenar Halldórsdóttur eftir afdrifaríkan uppbótartíma í sigrinum gegn ÍBV í 8-liða úrslitum. Elín Metta sótti sér tvö gul spjöld og þar með rautt, en þá var þó enn tími til stefnu fyrir Ásdísi til að fá sitt annað gula spjald í keppninni. Myndband af því þegar Elín Metta fékk rauða spjaldið má sjá hér að neðan.

„Þetta var mjög kjánalegt, og Elín Metta hefur ekki fengið rautt spjald síðan í U19-verkefni árið 2014. Hún fær fullt af gulum spjöldum, því hún djöflast og lætur finna fyrir sér sem er gott og blessað, en það var rosalega úr karakter að fá þetta rauða spjald.

En eins og síðasti leikur Vals og Breiðabliks spilaðist þá leið Blikunum ágætlega með að loka á Elínu og ýta henni svolítið frá markinu. Mögulega verður það bara styrkur að fá Cyeru [Hintzen] inn, sem Blikarnir þekkja ekki, og svo kannski Ídu Marín í stað Ásdísar Karenar. Ída Marín hefur verið að spila betur upp á síðkastið og hefur fullt af gæðum. Svo gæti Clarissa Larisey komið þarna inn. Hún virðist ekki alveg nógu líkamlega sterk en ef að Cyera hefur það gæti hraði Clarissu notið sín betur,“ segir Mist.

Hintzen gæti valdið Blikum vandræðum

Sóknarmaðurinn Cyera Hintzen og miðjumaðurinn Lára Kristín Pedersen bættust nýverið í leikmannahóp Vals.

„Maður hefur ekki séð mikið til Cyeru en þó það að það er hraði og kraftur í henni. Hún er ákveðinn X-faktor sem gæti verið góður fyrir Val í þessum leik. Liðið hefur verið gagnrýnt fyrir að vera fyrirsjáanlegt, með hægar sóknir, en þarna er kominn X-faktor sem getur breytt hlutunum. Eitthvað sem Blikar þekkja ekki inn á. Lára Kristín hefur líka komið mjög sterk inn og með öðruvísi drifkraft inn á miðjuna.“

Áttu ekki séns í Öglu Maríu og Áslaugu Mundu

Eftir að hafa fengið á sig sjö mörk í síðasta leik gegn Blikum er samt nokkuð ljóst að vandi Vals liggur frekar í varnarleiknum:

„Það sem Valur klikkaði algjörlega á í síðasta leik gegn Blikum var að liðið átti ekki séns í hraðann hjá þeim. Það verður áfram aðalsvopn Blikanna enda Agla María og Áslaug Munda búnar að vera stórkostlegar. Ég hef samt ekki áhyggjur af því að Valskonur leysi þetta ekki mikið betur núna. Þær voru gjörsamlega á hælunum. Innkoma Láru á miðsvæðið mun létta mikið á. Svo er leikmaður eins og Mary Alice Vignola, sem var nú bara „ekki með“ í fyrstu sjö leikjum tímabilsins, að komast betur í gang, og getur því ráðið betur við hraða Blika.“

Blikar spila vel á móti bestu liðunum

Breiðablik hefur bætt við sig belgísku landsliðskonunni Chloé Vande Velde frá síðasta leik við Val. Íslandsmeistararnir hafa verið mjög óstöðugir en Mist bendir á að gegn betri liðum landsins hafi þeir staðið sig vel:

„Blikar hafa spilað vel á móti bestu liðunum en klikkað á móti liðunum sem spila mjög þétt aftur og mjög beint fram – liðum sem ráðast á Blika eftir að þeir hafa misst boltann; langur bolti í gegn og hafsentar út úr stöðu. Valsararnir gætu reynt að vinna eitthvað með það. Til að skora gegn Blikum þarf að ná þeim úr jafnvægi, koma hratt á þær, því þeim líður ágætlega þegar þær ná að stilla upp í vörn.

Mér finnst Vande Velde ekki hafa náð að taka þau gæði sem hún á að hafa inn í leiki. Sömuleiðis er Taylor Ziemer augljóslega með mjög góðan fót, og búin að skora nokkur fín mörk, en fyrir utan það finnst mér ekkert brjáluð vinnsla í henni og hún ekki verið neitt frábær. Agla María og Áslaug Munda munu áfram sjá um allt í sóknarleik Blika en það verður áhugavert að sjá varnarleikinn þeirra sem hefur verið svo mikið „upp og niður“ – hvort hann sé eitthvað að skána. Þær fengu jú þrátt fyrir allt á sig þrjú mörk gegn Val.“

Báðir leikirnir í undanúrslitum Mjólkurbikars kvenna verða á Stöð 2 Sport í kvöld. Fyrst mætast Þróttur og FH klukkan 18 og svo Breiðablik og Valur klukkan 20.15.

Mjólkurbikarinn er á Stöð 2 Sport en upplýsingar um útsendingar má finna hér. Mjólkurbikarinn er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.