Spilar Grealish sinn fyrsta leik í dag?

Grealish varð í vikunni dýrasti leikmaður sem ensk félagslið hefur keypt. Manchester City borgaði uppeldisfélagi hans Aston Villa 100 milljónir punda fyrir þjónustu sóknartengiliðsins.

Samkvæmt breskum fjölmiðlum stefnir Josep Guardiola ekki langan aðlögunartíma hjá Grealish áður en hann spilar sinn fyrsta leik í ljósbláu treyjunni, heldur muni hann taka þátt í leik dagsins, aðeins tveimur dögum eftir skipti sín til Manchester-borgar.

Grealish verður í treyju númer 10 hjá félaginu, sem Sergio Aguero skildi eftir sig þegar hann samdi við Barcelona fyrr í sumar.

Leicester gæti einnig sýnt ný andlit í leik dagsins. Sambíski framherjinn Patson Daka var keyptur til liðsins á 23 milljónir punda frá RB Salzburg í sumar, auk franska miðjumannsins Boubakary Soumaré sem kom frá Frakklandsmeisturum Lille og vinstri bakvarðarins Ryan Bertrand sem kom frá Southampton.

Leicester verður án Wes Morgan sem lagði skónna á hilluna í sumar og þá verður Frakkinn Wesley Fofana ekki með eftir að hann varð fyrir fautatæklingu í æfingaleik við Villarreal í vikunni.

Fróðlegt verður að sjá hvort nýliðarnir taki þátt í dag er meistarar síðasta árs mætast í árlegu uppgjöri.

Leikurinn hefst klukkan 16:00 og hefst bein útsending frá honum klukkan 15:45 á Stöð 2 Sport 2.