Reyndu að sannfæra Jóhann en hafa ekki rætt ummælin um KSÍ

Jóhann dró sig út úr landsliðshópnum sem mætir Armeníu á föstudag og Liechtenstein næsta mánudag, í undankeppni HM. Hann sagðist gera það vegna hættu á meiðslum en í viðtali við 433.is bætti hann við að afskipti forystu KSÍ af liðsvali hefðu haft áhrif á ákvörðunina.

„Það sem hann sagði um KSÍ er eitthvað sem við höfum ekki rætt við Jóa en munum gera í rólegheitunum,“ sagði Arnar á blaðamannafundi í dag.

Áður en fyrrnefnd ummæli féllu höfðu þjálfararnir hins vegar rætt við Jóhann:

„Við að sjálfsögðu reyndum að sannfæra Jóa. Hann var fyrirliði liðsins í síðasta glugga,“ sagði Arnar, aðspurður hvort landsliðsþjálfararnir hefðu reynt að fá Jóhann ofan af ákvörðun sinni.

„Þetta hefur verið erfitt fyrir Jóa út af meiðslunum. Eftir leik helgarinnar, þar sem hann fékk í nárann aðeins, tilkynnti hann okkur að hann væri ekki 100 prósent,“ sagði Arnar en Jóhann kom inn á sem varamaður fyrir Burnley gegn Norwich í ensku úrvalsdeildinni á laugardag.