Bolarnir börðust til enda en baulað á Boston

Tímabilið heldur því áfram að ganga vel hjá Chicago sem er með besta sigurhlutfallið af öllum liðum deildarinnar nú þegar liðið hefur unnið sex af fyrstu sjö leikjum sínum.

DeMar DeRozan átti stóran þátt í sigrinum í nótt en hann skoraði 37 stig. Zach LaVine skoraði 26 og Nikola Vucevic skoraði 11, tók 10 fráköst og gaf 9 stoðsendingar.

Boston var 94-75 yfir þegar um þrjár mínútur voru eftir af þriðja leikhluta og liðið var enn fjórtán stigum yfir fyrir síðasta leikhlutann, 103-89. Þá skoraði Chicago hins vegar 12 stig í röð, minnkaði muninn í 103-101, og hafði enn átta mínútur til að tryggja sér að lokum öruggan sigur.

„Það var ofboðslega gott að sjá hvernig við héldum áfram að berjast. Við vorum langt undir, á erfiðum útivelli, en urðum ekki of órólegir,“ sagði DeRozan.

Jaylen Brown skoraði 28 stig fyrir Boston en liðið hefur nú tapað þremur leikjum í röð og mátti þola baul frá áhorfendum í leikslok.