Kallaður Greta Thunberg fótboltans

Thorsby hefur verið kallaður „Greta Thunberg fótboltans“ og líkar það vel. Þessum 25 ára gamla leikmanni, sem leikið hefur 12 leiki fyrir norska landsliðið, hefur alltaf verið annt um jörðina en fór að berjast með markvissum hætti gegn loftslagsbreytingum fyrir nokkrum árum þegar hann var leikmaður Heerenveen í Hollandi.

„Þetta er svo risastórt mál en það var enginn í kringum mann að tala um það. Það gerði mig sorgmæddan og jafnvel þunglyndan. Ég hugsaði með mér: Við erum með „mega“ vandamál hérna og hvað er ég að gera? Spila fótbolta. Það virtist ekki ganga upp í mínum huga,“ sagði Thorsby í grein sem birtist fyrst í hollenska blaðinu De Volkskrant í nóvember.

Thorsby ákvað hins vegar að halda áfram í fótboltanum, og reyna að nýta fótboltann til þess að koma boðskap sínum á framfæri.

„Fótboltinn situr eftir þegar hann ætti að ganga fram með góðu fordæmi. Hann getur haft gríðarleg áhrif og verið jafnvel okkar bjargvættur. Þrír og hálfur milljarður manna um allan heim horfir á fótbolta. Það er ekkert í samfélaginu sem fleira fólk tengir við. Fótboltastjörnur eru stærstu áhrifavaldarnir,“ sagði Thorsby.

Hver vill ekki hreint vatn og hreint loft fyrir börnin?

Hann stofnaði We Play Green samtökin sem eru fyrri fótboltamenn sem vilja hjálpa jörðinni út úr loftslagsvandanum. Thorsby segir að rétta leiðin sé hins vegar ekki að predika yfir fólki heldur hvetja það til að taka lítil skref sem, ef nógu margir taki þau, verði að stórum skrefum.

„Hreint vatn og hreint loft fyrir börnin okkar – það eru skilaboðin. Hver myndi ekki vilja það?“ spurði Thorsby.

Hlógu fyrst þegar hann mætti á reiðhjóli

Þegar hann var hjá Heerenveen var eitt af hans fyrstu skrefum að fara á reiðhjóli á æfingar. Liðsfélagarnir, flestir á rándýrum eðalbifreiðum, hlógu að honum. Thorsby útskýrði hins vegar fyrir þeim hvað fyrir honum vakti og hvatti þá til að gera slíkt hið sama.

„Fyrst var maður litinn hornauga. En svo áttuðu menn sig og félagið útvegaði hjól fyrir okkur. Ef að veðrið varð allt í einu mjög slæmt þá voru menn minna ánægðir með mig,“ sagði Thorsby hlæjandi.

Eftir að hafa flust til Ítalíu árið 2019 hefur hann haldið áfram að hvetja liðsfélaga sína til að hugsa um jörðina, til að mynda með því að minnka kjötneyslu og nota hjól eða rafmagnsbíla, og deila litlu skrefunum sínum á samfélagsmiðlum. En er erfitt að fá fótboltamenn til þess að berjast gegn loftslagsbreytingum?

„Já, það er það. Í búningsklefanum er ég enn „græni guttinn“ sem hlegið er að þegar maður gerir eitthvað sjálfur sem ekki er alveg sjálfbært. Á Ítalíu kalla þeir mig Grétu Thunberg fótboltans. Það er í góðu lagi – Ég dáist endalaust að henni,“ sagði Thorsby.