Ekki þurft að fljúga tómum vélum vegna reglna ESB

Ástæðan er reglur Evrópusambandsins sem kveða á um þá lágmarksnýtingu afgreiðslutíma á flugvöllum sem flugfélög þurfa að nýta til að eiga öruggt með að halda þeim á næsta tímabili. Lendinga- og brottfaratímar á vinsælum flugvöllum eru verðmæt auðlind fyrir flugrekendur og forsenda þess að þeir geti flutt þangað farþega.

Hvorki Icelandair né Play hafa gripið til þess ráðs að fljúga hálftómum flugvélum til þess eins að halda afgreiðslutímum sínum að sögn fulltrúa þeirra.

Almenn undanþága ekki lengur í gildi

„Það hefur ekki komið til þessa hjá okkur vegna þeirra undanþága sem í gildi hafa verið varðandi nýtingu á afgreiðslutímum á þeim mörkuðum sem við störfum,“ segir í skriflegu svari Ásdísar Ýrar Pétursdóttur, samskiptastjóra Icelandair, við fyrirspurn Vísis.

Nýting afgreiðslutíma sé ein af þeim breytum sem höfð sé í huga þegar tekin er ákvörðun um að fella flug niður en það sé ekki ráðandi þáttur.

Að sögn Ásdísar er í venjulegu árferði miðað við að nýting afgreiðslutíma á ákveðnu tímabili sé 80% til þess að flugfélag haldi sjálfkrafa afgreiðslutímum á næsta tímabili, en miðað er við tvö tímabil á ári.

„Frá því að COVID-19 skall á hafa verið í gildi undanþágur frá þessari nýtingarkröfu vegna áhrifa mikilla ferðatakmarkana á flugfélög. Hvað Icelandair varðar, þá var til að mynda í gildi síðastliðið sumar víðtæk undanþága á flestum þeim flugvöllum/löndum sem Icelandair flýgur til.“

Ásdís segir að í vetur sé áfram í gildi víðtæk undanþága í Bretlandi, Kanada og Bandaríkjunum. Í Evrópu hafi krafa um nýtingarhlutfall verið lækkuð niður í 50%, auk þess sem hægt sé að sækja um tímabundnar undanþágur vegna ferðatakmarkana í einstaka löndum.

Nadine Guðrún Yaghi, samskiptastjóri Play, segir að flugfélagið hafi ekki heldur farið sömu leið og Lufthansa og flogið tómlegum flugvélum til þess að ná lágmarkskröfum um afgreiðslutíma. 

Play hafi vissulega þurft að aflýsa flugferðum vegna áhrifa faraldursins líkt og önnur flugfélög. Til að mynda hafi útgöngubönn í erlendum borgum dregið úr eftirspurn eftir flugsætum til styttri tíma.

Óloftslagsvænt og óþarft

Framkvæmdastjórn Evrópusambandsins hefur hlotið gagnrýni vegna reglnanna, einkum nú þegar ómíkron afbrigðið dregur aftur úr ferðavilja fólks. Hafa forsvarsmenn evrópskra flugfélaga sagt reglurnar taktlausar og krafist breytinga.

Þá hefur sænski aðgerðasinninn Greta Thunberg, sem hefur kallað eftir því að Evrópusambandið leggi fram metnaðarfyllri stefnu í loftslagsmálum, skotið föstum skotum að sambandinu vegna málisins.

Samgönguráðherra Belga vill breytingar

Belgískir fjölmiðlar greina frá því að Georges Gilkinet, samgönguráðherra landsins og meðlimur grænflokksins Ecolo, hafi sent bréf um málið til Adina Valean, samgönguráðherra framkvæmdastjóri ESB. 

Þar segir hann núverandi fyrirkomulag vera óskiljanlegt og hvorki þjóna umhverfislegum né efnhagslegum sjónarmiðum. Kallar Gilkinet eftir því að boðið verði upp á aukinn sveigjanleika þegar kemur að nýtingu afgreiðslutíma á flugvöllum og kröfur um lágmarksnýtingu verði lækkaðar frekar.

Belgíska flugfélagið Brussels Airlines, sem er hluti af Lufthansa Group, gerir ráð fyrir að fljúga þrjú þúsund ónauðsynlegar flugferðir í vetur að óbreyttu.