Tárast yfir minnisvarðanum í heimabæ mömmu

Ástæðan er auðvitað sú að Duplantis keppir fyrir hönd Svíþjóðar og að móðir hans, fyrrverandi sjöþrautarkonan Helena, er frá Avesta. Þar varði Duplantis líka mörgum sumrum hjá ömmu sinni og afa.

Eftir að Duplantis komst yfir 6,19 metra á móti í Serbíu í vikunni var minnisvarðanum í Avesta breytt, til að sýna nýja heimsmetið, en Duplantis birti mynd af honum á samfélagsmiðlum:

Eins og sjá má stendur minnisvarðinn við hlið stórs Dalahests en leikfangið fræga er orðið að einkennismerki fyrir sænsku Dalina.

Duplantis hefur áður sagt að það hafi haft afar mikla þýðingu fyrir hann að sjá minnisvarðann rísa. Hann hafi áður í raun ekki gert sér nægilega vel grein fyrir því hve merkilegt það væri að hafa sett heimsmet.

„Þegar ég sá minnismerkið við Dalahestinn skyldi ég fyrst hvað frammistaða mín hafði mikla merkingu. Það er fallegt af þeim að reisa svona minnisvarða mér til heiðurs við hliðina á einkennismerki alls svæðisins. Ég brotnaði saman þegar ég sá þetta. Ég gat ekki haldið aftur af tárunum,“ sagði Duplantis í viðtali í lok árs 2020.

Duplantis hafði reynt 51 sinni við 6,19 metra og tókst loks að komast yfir rána í Serbíu, þar sem heimsmeistaramótið innanhúss fer einmitt fram eftir rúma viku.

„Loksins!“ sagði Helena móðir hans við SVT. „Þetta var skemmtilegt. Hann hefur verið svo nálægt þessu svo oft,“ sagði Helena og benti á að stökkið gæfi góð fyrirheit fyrir HM.