Endaði á nærbuxunum til að gleðja gamla aðdáendur

Rakitic var í liði Sevilla í gær og var einn af þeim sem Pedri fíflaði upp úr skónum áður en hann skoraði sigurmark Barcelona, í 1-0 sigri í spænsku 1. deildinni í fótbolta í gær.

Rakitic var hins vegar ekki sárari en svo eftir tapið að hann gaf sér tíma til að fara og þakka stuðningsmönnum Barcelona fyrir sig.

Rakitic var í miklum metum hjá Barcelona og vann 13 titla með félaginu á sex árum, þar á meðal spænska meistaratitilinn fjórum sinnum.

Hann var svo seldur til Sevilla í september 2020 en vegna kórónuveirufaraldursins gafst ekki tækifæri fyrir stuðningsmenn til að kveðja hann, og áhorfendur voru bannaðir þegar Rakitic sneri aftur á Camp Nou á síðustu leiktíð.

Stundin í gær var því langþráð fyrir bæði hann og stuðningsmenn Barcelona sem eins og fyrr segir fengu fötin hans að viðskilnaði.

Með sigrinum í gær komst Barcelona upp fyrir Sevilla og Atlético Madrid en liðin eru hvert um sig með 57 stig, í 2.-4. sæti spænsku deildarinnar. Barcelona á auk þess leik til góða en enn eru 12 stig í topplið Real Madrid sem á spænska meistaratitilinn vísan.