„Á meðan rússneskur hermaður stígur fæti á úkraínska grund þá er ekkert nóg“

Árásir Rússa héldu áfram í austurhluta Úkraínu yfir páskahelgina auk þess sem tilkynnt var um árásir í suður og vesturhluta landsins. Vólódímír Selenskí, forseti Úkraínu, segir úkraínska hermenn halda áfram að verjast árásum Rússa víða.

„Á Kharkiv-svæðinu, í átt að Izyum í Donbas, sérstaklega nærri Popasna, í Mariupol, þar sem mótspyrna varnarliðsins heldur áfram, í suðurhlutanum þar sem hernámsliðið reynir að sækja fram,“ sagði Selenskí í ávarpi í dag um stöðu mála.

Tekist á um árangur Rússa

Anthony Blinken, utanríkisráðherra Bandaríkjanna, og Lloyd Austin, varnamálaráðherra, funduðu með Selenskí í gær og í dag lofuðu þeir aukinni aðstoð til Úkraínu, meðal annars í formi vopna.

„Við teljum að þeir geti unnið ef þeir hafa rétta búnaðinn, réttan stuðning og við munum halda áfram að gera allt sem í okkar valdi stendur, til að tryggja að þeir fái hann,“ sagði Austin á blaðamannafundi í dag.

Þá var Blinken sammála um að Úkraína gæti unnið stríðið. „Þegar kemur að markmiðum Rússa í stríðinu þá er þeim að mistakast. Úkraína nær góðum árangri,“ sagði Blinken á fundinum.

Dmitry Polyanskiy, aðstoðarsendiherra Rússlands hjá Sameinuðu þjóðunum, var þó ekki sammála þessum ummælum Blinkens.

„Okkur hefur ekki mistekist. Við höldum hernaðaraðgerðum okkar áfram. Þetta er ekki stríð. Þetta er hernaðaraðgerð. Hún hefur sína eigin hernaðaráætlun, sín eigin markmið. Þetta átti aldrei að vera leifturstríð,“ sagði Polyanskiy á blaðamannafundi í New York í dag.

Utanríkisráðherra Úkraínu sagði í viðtali við AP fréttaveituna í dag að fundurinn milli forsetans og ráðherranna hafi verið mikilvægur en að meira þurfi til.

„Á meðan rússneskur hermaður stígur fæti á úkraínska grund þá er ekkert nóg,“ sagði Kuleba og bætti við að vestræn ríki þyrftu að vera tilbúin til að veita Úkraínumönnum aðstoðar án tafar, vilji þau í raun stöðva stríðið og koma í veg fyrir að Rússar ráðist inn í önnur lönd.

Forsetarnir funda með aðalframkvæmdastjóra Sameinuðu þjóðanna

Fleiri fundir áttu sér stað í dag en Antonio Guterres, aðalframkvæmdastjóri Sameinuðu þjóðanna, ræddi til að mynda við Recep Erdogan, forseta Tyrklands um mikilvægi þess að koma á fót öruggum flóttaleiðum frá borgum á borð við Mariupol.

Guterres mun síðan funda með Vladímír Pútín, forseta Rússlands, á morgun og Selenskí á fimmtudag.

Pútín sakaði Vesturlönd í dag um að freista þess að eyðileggja Rússland innan frá og sakaði bandarísku leyniþjónustuna CIA um að stjórna aðgerðum sem miðuðu að því að grafa undan Rússlandi.