Fimmtán dagar í EM: Er að læra taugafræði í Harvard og elskar mjólkurgraut með súru slátri og rúsínum

Hin 21 árs gamla Áslaug Munda Gunnlaugsdóttir er einkar áhugaverður leikmaður. Líkt og svo margar í landsliðinu þá er hún gríðarlega reynslumikil þrátt fyrir ungan aldur. Ásamt því að vera stórgóð inn á vellinum þá kann hún vel við sig fyrir framan bækurnar og stundar í dag nám við Harvard háskóla í Bandaríkjunum. 

Þó hún hafi spilað með Breiðabliki um árabil þá er hún alin upp á Egilsstöðum og hóf ferilinn með Hetti. Þaðan fór hún til Völsungs á Húsavík og svo loks Breiðabliks áður en leið hennar lá til Bandaríkjanna.

Áslaug Munda hefur „aðeins“ leikið fimm A-landsleiki en þar spilar höfuðhögg inn í sem hún fékk í leik með Harvard stuttu eftir að hún hélt ytra. Hélt það henni frá keppni í dágóða stund en hún hefur nú náð sér að fullu og verður forvitnilegt að sjá hvað hún gerir.

Það segir sitt um hraða og tækni Áslaugar Mundu að hún hefur annars vegar spilað vinstri bakvörð fyrir Blika eða þá hægri væng í 4-3-3 leikkerfi.

Fyrsti meistaraflokksleikur? Apríl 2015

Hver hefur kennt þér mest í fótbolta? Ljuba þjálfaði mig í Hetti og kenndi mér grunnhluti fótboltans. Steini Halldórs kom mér síðan skrefinu lengra.

Lag sem kemur þér í gírinn fyrir leik? Ég lifi í voninni með Stjórninni.

Mætir einhver af fjölskyldu/vinum til að styðja þig á EM? Í kringum 40 af mínu fólki ætla að mæta.

Hvaða námi eða vinnu hefur þú sinnt (fyrir utan fótbolta)? Ég er að læra taugafræði (e. Neuroscience) í Harvard University.

Í hvernig skóm spilarðu? Nike Tiempo.

Uppáhalds lið í enska? Manchester City.

Uppáhalds tölvuleikur? Minesweeper er hugarróándi leikur.

Uppáhalds matur? Mjólkurgrautur með súru slátri og rúsínum.

Fyndnust í landsliðinu? Hallbera og Cessa eiga sínar stundir

Gáfuðust í landsliðinu? Agla María og Elín Metta.

Óstundvísust í landsliðinu? Telma Ívars mætir nú oft á slaginu, og ekki sekúndu fyrr, í vinnuna á Kópavogsvelli en ef hana langar getur hún verið mjög tímanlega sömuleiðis.

Hvaða lið vinnur EM (ef ekki Ísland)? Spánn, kannski England.

Hvað er skemmtilegast að gera milli æfinga og leikja í landsliðsferðum? Njóta samverunnar með stelpunum.

Besti andstæðingur/leiðinlegasti andstæðingur? Hef alltaf fundist erfitt að mæta Öglu Maríu á æfingum. Finnst bara best að hafa hana með mér í liði.

Átrúnaðargoð í æsku? Lionel Messi.

Nefndu eina staðreynd um þig sem fáir vita: Við systur skipuðum boðhlaupssveit í fullorðinsflokki árið 2013. Þá 18, 14, 12 og 7 ára gamlar með góðum árangri þrátt fyrir lágan meðalaldur. Við endurtókum svo leikinn ári seinna.