Tíu dagar í EM: Var alltaf að fá blóð­nasir og fer í ó­um­beðnar heim­sóknir

Cecilía er enn aðeins átján ára gömul og því á meðal yngstu leikmanna á EM en komist Ísland nógu langt á mótinu mun hún fagna nítján ára afmælinu sínu í Englandi.

Þrátt fyrir ungan aldur veitir hún Söndru Sigurðardóttur harða keppni um stöðu í byrjunarliði Íslands og hefur þegar leikið átta A-landsleiki, þar af tvo í yfirstandandi undankeppni HM 2023.

Cecilía er einn þriggja Íslendinga hjá þýska stórveldinu Bayern München og kom þangað í janúar að láni frá Everton. Fregnir herma að hún hafi þegar skrifað undir samning við Bayern sem gildi til ársins 2026. 

Áður lék hún með Örebro í Svíþjóð í fyrra en Cecilía er uppalin hjá Aftureldingu og sló svo í gegn sem markvörður Fylkis, þar sem hún lék sína fyrstu úrvalsdeildarleiki 15 ára gömul.

Fyrsti meistaraflokksleikur? 2017.

Hver hefur kennt þér mest í fótbolta? Þorsteinn Magnússon gamli markmannsþjálfari minn kenndi mér nánast allt sem ég kann.

Lag sem kemur þér í gírinn fyrir leik? Never going home.

Mætir einhver af fjölskyldu/vinum til að styðja þig á EM? Foreldrar mínir og systkini ætla að mæta og svo kemur amma mín líka. Þetta eru mínir helstu stuðningsmenn plús reyndar hin amma mín og afi sem láta sjónvarpið nægja í þetta sinn.

Hvaða námi eða vinnu hefur þú sinnt (fyrir utan fótbolta)? Ég er að vinna í því að klára stúdentinn hjá Verzlunarskóla Íslands.

Í hvernig skóm spilarðu? Puma future Z.

Uppáhalds lið í enska? Manchester United.

Uppáhalds tölvuleikur? Fifa 22.

Uppáhalds matur? Íslenskur fiskur í raspi.

Fyndnust í landsliðinu? Ótrúlegt en satt finnst mér allar vera sjúklega fyndnar og skemmtilegar. Gló [Glódís Perla Viggósdóttir] í gír er samt það besta sem ég veit um.

Gáfuðust í landsliðinu? Auto að setja Áslaugu Mundu sem er í Harvard.

Óstundvísust í landsliðinu? Dagný svona oftast.

Hvaða lið vinnur EM (ef ekki Ísland)? Svíþjóð.

Hvað er skemmtilegast að gera milli æfinga og leikja í landsliðsferðum? Ég og Sveindís erum duglegar að fara á milli herbergja í óumbeðnar heimsóknir.

Besti andstæðingur/leiðinlegasti andstæðingur? Mér fannst alltaf leiðinlegast að keppa á móti Örnu Sif þegar ég spilaði á Íslandi því hún svoleiðis kjötaði mig í loftinu í hornum enda nautsterk. Ási [Ásmundur Haraldsson, aðstoðarlandsliðsþjálfari] var líka mjög leiðinlegur í 3v3 um daginn þegar ég spilaði sem útileikmaður því hann ruglaðist stundum og hélt að við værum að spila rúgbý og tæklaði mig eftir því.

Átrúnaðargoð í æsku? Hope Solo og Manuel Neuer.

Nefndu eina staðreynd um þig sem fáir vita: Fékk blóðnasir upp úr þurru næstum annan hvern dag þegar ég var yngri. Sem betur fer hefur það farið minnkandi.

Fyrsti leikur Íslands á EM er gegn Belgíu 10. júlí. Liðið mætir svo Ítalíu 14. júlí og Frakklandi 18. júlí. Tvö þessara liða komast áfram í 8-liða úrslit.