Óskar ráðinn framkvæmdastjóri Smyril line

Í tilkynningu frá Smyril line segir að Óskar Sveinn hafi verið framkvæmdastjóri véla-, kæli- og renniverkstæðisins Kapp undanfarin þrjú ár. Þar hafi hann stýrt stækkandi fyrirtæki í gegnum krefjandi tíma.

Árin þar á undan hafi Óskar stýrt fjölmörgum uppbyggingarverkefnum í flutningageiranum og hafi yfir tveggja áratuga reynslu á því sviði.

,,Ég hef á mínum ferli fengið tækifæri í ýmsum stjórnendastöðum víða um heim innan flutningageirans og síðastliðin þrjú ár stýrt því skemmtilega fyrirtæki Kapp ehf. Flutningabransinn er mjög spennandi á Íslandi og það sem Smyril Line hefur verið að gera hér á landi er einstakt. Þegar mér gafst svo tækifæri á að taka þátt í áframhaldandi vexti Smyril Line á Íslandi þá var ekki annað hægt en að segja já takk við því. Ég mun kveðja Kapp með söknuði en á sama tíma hlakka ég mikið til nýrra verkefna,” er haft eftir Óskari Sveini.

Hann mun taka við störfum 8. ágúst næstkomandi.

,,Við erum mjög ánægð að fá Óskar í öflugan hóp starfsmanna Smyril Line. Hann hefur sýnt það á síðustu árum að hann er öflugur stjórnandi í alþjóðlegu umhverfi sem mun nýtast okkur vel í áframhaldandi vexti,” er haft eftir Jens Meinhard Rasmussen, stjórnarformanni Smyril Line Ísland ehf.