„Mun verri umgengni um fiskauðlindina en við bjuggumst við“

Talsmenn útgerðarinnar Stakkfells hafa hafnað því að hafa stundað brottkast á afla að yfirlögðu ráði á síðasta ári. Tækjabilun hafi valdið því að áhöfn dragnótarbátsins Onna hafi þurft að henda tæpum tveimur tonnum af fiski sem að megninu hafi verið lifandi. Þá hafi annað brottkast sem kom fram við eftirlit Fiskistofu verið vegna þess að nokkrum fiskum hafi skolað út af dekki. Fiskistofa svipti bátinn Onna veiðileyfi í átta vikur.

Erna Jónsdóttir sviðsstjóri stjórnsýslu -og upplýsingasviðs Fiskistofu segir að stofnunin hafi talið að áhöfnin hefði átt að geta bjargað aflanum þrátt fyrir tækjabilunina.

„Það lá fyrir myndband til grundvallar ákvörðuninni um sviptingu veiðileyfis. Við fórum yfir það og það sést í úrskurðinum sjálfum. Það var ekki hægt að sjá þar að það væru gerðar tilraunir til að bjarga fisknum heldur var bara losað úr pokanum. Ákvörðun okkar var því byggð á því að áhöfnin hefði ekki sýnt neina viðleitni til að taka aflann um borð. Við sáum meira segja að sá fiskur sem þó kom um borð úr pokanum, honum var bara kastað aftur í sjóinn,“ segir Erna. 

Talsmenn Stakkfells halda því fram að stærsti hluti þess afla sem var hent frá borði hafi verið lifandi. Erna kannast ekki við það. 

„Ég sá þetta myndband og þetta var ekki lifandi fiskur heldur afli sem flaut kringum skipið. Mögulega hefur eitthvað verið lifandi en alls ekki stór hluti,“ segir hún.

Aðspurð um af hverju hafi ekki verið tekið neitt tillit til útskýringa áhafnarinnar um að tækjabilun hafi valdið því að losa þurfti aflann frá skipinu, svara Erna. 

„Það er bent á í úrskurðinum að þeir hefði getað dregið pokann meðfram skipinu og í land. Þeir hefðu einnig getað kallað eftir aðstoð frá aðliggjandi bátum. Þá var aflinn ekki skráður í afladagbók sem er skylda.“ 

Talsmenn Onna sögðu sviptinguna hafa gríðarleg áhrif á útgerðina. Erna segir að það þurfi að líta til fleiri þátta í svona málum.

Talsmaður Onna gerði athugasemd við að togarinn Kleifaberg sem var sviptur veiðiréttindum í 12 vikur vegna stórfells brottkast fyrir nokkrum árum hafi fengið þeirri ákvörðun Fiskistofu hnekkt af ráðherra. Erna vísar í úrskurð ráðuneytisins og segir að málið hafi ekki verið fellt niður því sviptingin hafi verið talin ósanngjörn heldur því brotin sem náðust á myndband og voru send til Fiskistofu voru mjög gömul. Þá hafi ráðuneytið talið að rannsókn málsins hafi verið ábótavant. 

Erna segir koma á óvart hversu algengt sé að áhafnir stundi brottkast. 

„Frá því Fiskistofa hóf að nota dróna við veiðieftirlit fyrir einu og hálfu ári við veiðieftirlit höfum við séð næstum annan hvern bát stunda brottkast af einhverju leyti. Þetta er mun verri umgengni um fiskauðlindina en við bjuggumst við,“ segir Erna.