Conte segir mynd­bands­dómgæslu vera að skemma leikinn

Tottenham er í harðri baráttu um að komast upp úr D-riðli en sigur í kvöld hefði komið liðinu í einkar góða stöðu. Eftir að lenda undir náðu heimamenn að jafna metin og Harry Kane hélt hann hefði skorað sigurmarkið þegar fimm mínútur voru komnar fram yfir venjulegan leiktíma.

Markið var skoðað í bak og fyrir af myndbandsdómurum leiksins og á endanum var ákveðið að Kane væri rangstæður. Conte brást hinn versti við og var í kjölfarið sendur upp í stúku.

Conte svaraði aðeins einni spurningu á blaðamannafundi sínum eftir leik en talaði þó í rúmlega tvær mínútur.

„Út af öllu fólkinu sem kom inn á völlinn ákvað dómarinn að senda mig af velli. Ég held að þarna sé augnablik þar sem þú gætir verið aðeins klókari og áttað þig á að þú hafir tekið af löglegt mark af því markið var löglegt af því boltinn er fyrir framan Kane.“

„Þið vitið að ég tjái mig ekki um ákvarðanir dómara en myndbandsdómgæslan (e. VAR) á þessari leiktíð – og ég veit ekki af hverju – milli ensku úrvalsdeildarinnar og Meistaradeildarinnar þá erum við ekki svo heppnir,“ sagði Conte áður en hann fór að tjá sig um vítaspyrnur og hversu margar þeirra væru teknar aftur ef markvörðurinn hreyfði sig.

„Ég tel að myndbandsdómgæslan sé að valda miklum skaða og ég væri til í að sjá dæmt mark af öðru stóru liði í mikilvægum leik á heimavelli. Ég vil sjá hvort myndbandsdómgæslan sé jafn hugrökk og taki sömu ákvörðun,“ sagði Conte og taldi greinilega að mark líkt og það sem Tottenham skoraði í kvöld yrði ekki dæmt af stórliðum Evrópu.

„Þið verðið að afsaka, ég er í uppnámi. Stundum getur maður sætt sig við aðstæður sem er ekki gott því ég sé ekki sanngirni í aðstæðum sem þessum.“

„Eftir frammistöðu okkar í síðari hálfleik taldi ég að við hefðum átt að vinna leikinn. En nú, eftir þessa ákvörðun þá þurfum við að bíða þangað til eftir lokaleik riðlakeppninnar. Þessi ákvörðun orsakaði mikinn skaða, ég vona að félagið skilji það og tali svo við þau sem þarf að tala við. Annars er það bara þjálfarinn að tjá sig. Ég held að félagið verði að vera sterkt af því að þessi ákvörðun leiðir af sér mikinn skaða. Við vitum ekki hvað gerist í næstu viku,“ sagði Conte að lokum.

Staðan í D-riðli er þannig að Tottenham er á toppnum með 8 stig. Sporting og Eintracht Frankfurt eru með 7 stig í öðru og þriðja sæti á meðan Marseill er á botninum með 6 stig. Tottenham heimsækir Marseille í lokaumferðinni á meðan Sporting tekur á móti Frankfurt.