Bræður berjast fyrir bótum vegna Brúneggjamálsins

Kolbeinn Tumi Daðason skrifar 28. nóvember 2022 11:26

Tryggvi Aðalbjörnsson var verðlaunaður af Blaðamannafélagi Íslands fyrir rannsóknarblaðamennsku sína í umfjöllun Kveiks um Brúnegg. Hér er hann í spyrilssætinu í Kveik þar sem hann spurði Kristinn Gylfa hjá Brúneggjum spjörunum úr. Kveikur

Aðalmeðferð í skaðabótamáli fyrrverandi eigenda Brúneggja gegn Ríkisútvarpinu og Matvælastofnun hófst í Héraðsdómi Reykjavíkur í dag. Þetta er í annað skiptið sem eggjaframleiðendurnir láta reyna á rétt sinn fyrir dómstólum.

Umfjöllun fréttaskýringaþáttarins Kveiks um eggjaframleiðsluna hjá Brúneggjum vakti mikla athygli. Þar kom fram að að Brúnegg hefðu til lengri tíma merkt framleiðslu sína sem vistvæna án þess að hafa uppfyllt skilyrði til þess. Þá hefði Matvælastofnun ekki upplýst neytendur um málið.

Brúnegg var tekið til gjaldþrotaskipta í mars árið 2017, nokkrum mánuðum eftir umfjöllun Kastljóss um fyrirtækið, þar sem margar verslanir og verslanakeðjur tóku eggin úr sölu hjá sér í kjölfar umfjöllunar Kastljóss.

Stefnendur eru tvö félög í eigu bræðranna Kristins Gylfa og Björns Jónssona, en þrotabú Brúneggja framseldi allar skaðabótakröfur sínar. Þeir telja fréttaflutning RÚV hafa verið rangan og MAST farið út fyrir valdsvið sitt með upplýsingagjöf til RÚV.

Þá snúa kröfur þeirra bræðra einnig að meintu tjóni sem þeir telja sig persónulega hafa orðið fyrir vegna umfjöllunar Kastljóss. Fram kom á sínum tíma að eggi hefði verið kastað í hús Kristins Gylfa.

Fréttablaðið greindi frá því í september að meðal þeirra sem gefa skýrslu fyrir dómi eru Kristinn Gylfi, Jón Gíslason fyrrverandi forstjóri MAST og Tryggvi Aðalbjörnsson, fréttamaður Kveiks em hlaut blaðamannaverðlaun fyrir umfjöllun sína árið 2017.

Umsögn dómnefndar um blaðamannaverðlaun Tryggva

Tryggvi fletti ofan af einu stærsta neytenda- og dýravelferðarmáli undanfarinna ára með umfjöllun sinni um illa meðferð á varphænsnum hjá Brúneggjum. Mánuðum saman safnaði Tryggvi miklum upplýsingum frá Matvælastofnun sem sýndu marg ítrekuð brot Brúneggja á lögum um velferð dýra og reglugerð um velferð alifugla. Einnig sýndu gögnin hvernig neytendur hafa verið blekktir árum saman með merkingum Brúneggja um vistvæna framleiðslu, þrátt fyrir að hafa aldrei uppfyllt reglur um slíkt. Af þessu vissi Matvælastofnun, en upplýsti ekki.

Eftirlitsstofnanir eru mikilvægar stofnanir í nútímasamfélagi en til þess að þær virki sem skyldi þurfa þær að hafa bit þegar á þarf að halda. Það er hlutverk fjölmiðla að upplýsa almenning um brotalamir fyrirtækja og blekkingar. Það er ekki síður mikilvægt að fjölmiðlar upplýsi um máttleysi eftirlitsstofnana þegar að þær bregðast svo hægt sé að krefjast úrbóta.

Málið hefur þegar komið til kasta héraðsdóms. Í desember 2021 vísaði héraðsdómur málinu frá en Landsréttur var ósammála þeirri niðurstöðu í héraði. Taka skyldi málið fyrir í héraðsdómi. Aðalmeðferð stendur yfir í dómsal 201 í dag og á morgun.

Þóra Arnórsdóttir ritstjóri Kveiks sagðist í viðtali í Morgunútvarpinu á Rás 2 í fyrra ekki hafa neinar áhyggjur af málsókninni sjálfri. Málið hefði verið vel unnið og öll gögn enn til staðar til að styðja það sem þar hafi komið fram. Að hennar mati væri málsóknin óþarfi, þó vissulega hefðu allir rétt á að fá lausn sinna mála fyrir dómstólum, telji þeir á sér brotið.

„Þarna eru bara ekki forsendur fyrir því.“

Dómsmál Brúneggjamálið Fjölmiðlar Ríkisútvarpið

Tengdar fréttir

Mest lesið

Fleiri fréttir