Senda vestræna bryndreka til Úkraínu

Þar að auki tilkynntu Þjóðverjar í gær að auk þess að senda Marder-bryndreka til Úkraínu stæði einnig til að útvega mönnum annað Patriot-loftvarnarkerfi. Það er eitt háþróaðasta loftvarnarkerfi heims en Bandaríkjamenn ákváðu í síðasta mánuði að senda eitt slíkt til Úkraínu í ljósi umfangsmikilla dróna- og stýriflaugaárása Rússa á borgaraleg innviði í Úkraínu.

Úkraínumenn segjast þakklátir en segja sendingar skriðdreka bestu leiðina til að binda enda á stríðið sem fyrst.

Í yfirlýsingu sem Hvíta húsið birti í gær segir að Joe Biden, forseti Bandaríkjanna, og Olaf Scholz, kanslari Þýskalands, séu staðfastir í þeirri trú þeirra að nauðsynlegt sé að halda áfram nauðsynlegum stuðningi við úkraínsku þjóðina eins lengi og til þarf.

Úkraínumenn eru sagðir hafa orðið fyrir miklu mannfalli að undanförnu, eins og Rússar, en harðir bardagar hafa geisað víða á víglínunum í Úkraínu. Þá munu þeir hafa þörf á frekari hergögnum til að fylla upp í raðir sínar og til að undirbúa gagnárásir gegn Rússum í vetur og í vor.

Sjá einnig: Rússar sagðir stefna á aðra herkvaðningu

Eins og áður segir ætla Þjóðverjar að senda Marder bryndreka til Úkraínu en Bandaríkjamenn ætla að senda bryndreka sem kallast Bradley. Báðir bryndrekarnir eru meðal annars til í mismunandi útgáfum sem eru hannaðar til að flytja hermenn eða berjast og geta þeir verið notaðir til að granda rússneskum skrið- og bryndrekum.

Emmanuel Macron, forseti Frakklands, hafði fyrr í gær tilkynnt að til stæði að senda AMX-10 brynvarin farartæki til Úkraínu. Þau farartæki falla á milli flokka en gætu talist „léttir skriðdrekar“ þar sem þau eru ekki á beltum heldur hjólum og eru ekki varin þykkri brynvörn. Farartækin bera hins vegar fallbyssu eins og skriðdrekar.

Hergagnasendingarnar munu líklegast reynast Úkraínumönnum vel og gefa hersveitum Úkraínu meiri skotkraft í og meiri hreyfanleika. Wall Street Journal hefur eftir bandaríska herforingjanum Pat Ryder að bryndrekarnir muni reynast Úkraínumönnum vel.

„Þetta er ekki skriðdreki heldur skriðdrekadrápari,“ sagði herforinginn um Bradley bryndrekana á blaðamannafundi í gær. Hann vildi þó ekki segja hvaða útgáfur bryndrekanna Úkraínumenn myndu fá né gefa frekari upplýsingar um hvurslags tímaramma Bandaríkjamenn væru að vinna með varðandi sendingarnar til Úkraínu og þjálfun úkraínskra hermanna.

Vilja skriðdreka frá Vesturlöndum

Frá upphafi innrásar Rússa í Úkraínu hafa Úkraínumenn beðið um skriðdreka frá Vesturlöndum. Ríki sem voru áður á yfirráðasvæði Sovétríkjanna hafa sent mikið magn skriðdreka frá þeim tímum til Úkraínu en enn sem komið er hafa Úkraínumenn ekki fengið skriðdreka sem framleiddir eru á Vesturlöndum.

Í frétt WSJ segir að yfirvöld í Póllandi hafi til skoðunar beiðni frá Úkraínu um Leopard-skriðdreka, sem framleiddir eru í Þýskalandi. Heimildarmenn miðilsins segja Pólverja, sem hafa þegar gefið Úkraínu rúmlega 240 skriðdreka frá tímum Sovétríkjanna sem búið var að breyta og betrumbæta, vera að íhuga að gefa Úkraínu allt sem þeir geta.

Pólverjar hafa verið meðal háværustu stuðningsmanna Úkraínu varðandi það að senda skriðdreka til landsins. Þeir eru mun betur brynvarðir en bryndrekarnir sem talað er um hér að ofan og myndu gefa Úkraínumönnum meiri skotkraft.