Lygarinn á þingi sakaður um að brjóta kosningalög

Santos hefur notið mikillar athygli vestanhafs eftir að í ljós kom að Repúblikaninn frá New York skáldaði stóran hluta ferilskrár sinnar fyrir kosningarnar.

Hann útskrifaðist meðal annars ekki úr skólum sem hann sagðist hafa útskrifast úr, vann ekki hjá fyrirtækjum sem hann sagðist hafa unnið fyrir og svo dó mamma hans ekki vegna árásarinnar á Tvíburaturnana í New York árið 2001, eins og Santos hefur haldið fram.

Forfeður hans flúðu einnig ekki frá Evrópu á tímum seinni heimsstyrjaldarinnar vegna Helfararinnar og hann er ekki að hluta til af afrískum ættum, svo vísað sé til einhverra af yfirlýsingum hans.

Sjá einnig: Viðurkennir að hafa logið á ferilskránni en ætlar samt inn á þing

Samtökin Campaign Legal Center hafa lagt fram kvörtun gegn Santos og saka hann meðal annars um að fela uppruna fjármuna í kosningasjóðum hans og að nota þá sjóði til að greiða fyrir persónulega neyslu sína. Samtökin vilja að FEC taki málið til rannsóknar. 

Opinber skjöl sýna að Santos á sjálfur að hafa lánað framboði sínu 705 þúsund tali í fyrra. Árið 2020 voru heildareignir hans 55 þúsund dalir samkvæmt opinberum gögnum sem hann lagði fram í tengslum við framboð árið 2020 en CLC segir yfirlýsingar þingmannsins um að hann hafi hagnast um milljónir dala á árunum 2020 og 2021 í gegnum ráðgjafafyrirtæki sitt, Devolder Organization LLC, vera óljósar og ótrúverðugar.

Samtökin segja ýmislegt benda til þess að óþekktir aðilar eða fyrirtæki hafi dælt peningum í framboð Santosar með ólöglegum hætti.

Saurav Ghosh starfar hjá CLC en starfaði áður hjá FEC.

Hann er einnig sakaður um að hafa notað kosningasjóði til að greiða leigu af húsnæði sínu. Auk þess benda samtökin á fjölmörg skráð fjárútlát úr kosningasjóðum Santosar sem séu öll tæpir tvö hundruð dalir. Fjöldi þessara skráðu fjárútláta gefi til kynna af sömu upphæð gefi til kynna að brögð séu í tafli og Santos hafi reynt að hylma yfir í hvað peningarnir fóru raunverulega.

Í einu tilviki var skýring fyrir eina af minnst 37 greiðslum upp á 199,99 dali skráð vegna hótelgistingar í Miami í Flórída. Nóttin í ódýrasta herbergi þessa tiltekna hótels kostar þó rúma sjö hundruð dali. Tvær aðrar af þessum greiðslum voru skráðar sem kaup á mat og drykk á ítölsku veitingahúsi í Queens.

Kvörtunin beinist gegn Santos og Devolder Organization, fyrirtækis hans, auk Nany Marks, sem stýrði kosningasjóði hans. Marks hefur ekki svarað fyrirspurnum Washington Post undanfarna daga.

Starfsmenn FEC munu fara yfir kvörtunina og kanna hvort þeim þyki tilefni til þess að rannsaka Santos. Hvort rannsókn fari fram verður svo ákveðið af sex manna yfirstjórn FEC sem skipuð er af þremur Repúblikönum og þremur Demókrötum. Fjórir meðlimir stjórnarinnar þurfa að vera þeirrar skoðunar að rannsókn eigi að fara fram.

Fyrir hafa bæði alríkis- og sýslusaksóknarar í Bandaríkjunum eru þegar að rannsaka fjármál þingmannsins. Yfirvöld í Brasilíu hafa hann einnig til rannsóknar vegna fjársvikamáls.