Hellisheiði og Þrengsli lokuð: Allt að tíu bíla árekstur við Hveradali

Upprunalega barst tilkynning um að tíu bílar hefðu lent saman en líklegt er að þeir séu færri en það.

Búið er að loka bæði Hellisheiði og Þrengslum vegna færðar og veðurs en bílar sitja fastir á báðum leiðum. Björgunarsveitarfólk er þar að störfum og meðal annars á snjóbílum.

Einnig er verið að kanna hvort tveir menn séu týndir upp á Skarðsmýrarfjalli. Samkvæmt upplýsingum frá Landsbjörg er óljóst hvort mennirnir séu í einhverjum vandræðum eða bara í sambandsleysi í skála á fjallinu. Búið er að setja björgunarsveitarfólk í startholurnar í Reykjavík, ef leita þarf að mönnunum.

Samkvæmt Vegagerðinni er Mosfellsheiði enn opin en hún gæti lokast með skömmum fyrirvara. Þá hefur öllu innanlandsflugi verið aflýst í dag, samkvæmt upplýsingum á vef Isavia.