Óttast viðbrögð kjósenda við aðgerðum gegn rétti til þungunarrofs

Þegar eru byrjaðar að sjást vísbendingar um mikla óánægju almennra kjósenda í kosningum víðsvegar um Bandaríkin, samkvæmt AP fréttaveitunni. Meðal annars í Wisconsin þar sem kosið var til hæstaréttar ríkisins í síðustu viku. Þar vann frambjóðandi hlynntur þungunarrofi með ellefu prósentustigum.

Joe Biden vann í forsetakosningunum í Wisconsin með minna en einu prósentustigi.

Frambjóðendur Repúblikanaflokksins hafa einnig tapað með áberandi hætti í kosningum í Michigan, New Hampshire, Nevada og í Kansas á síðustu mánuðum eða frá því Hæstiréttur Bandaríkjanna felldi stjórnarskrárbundinn rétt kvenna til þungunarrofs úr gildi.

Vandi Repúblikana er sérstaklega mikill í kosningum yfir heil ríki, þar sem Repúblikanar hafa víða hagrætt kjördæmum sér í vil.

Sjá einnig: Hafnaði rétti kvenna til þungunarrofs

AP segir áhrifamenn sem koma að forsetaframboðum innan flokksins viðurkenna í einrúmi að Repúblikanaflokkurinn standi höllum fæti gagnvart umræðu um þungunarrof. Kannanir sýni að almennir kjósendur telji að þungunarrof eigi að vera löglegt í flestum tilfellum.

Á sama tíma séu aðgerðasinnar gegn þungunarrofi innan Repúblikanaflokksins að vara frambjóðendur við því að grasrótin, sem tekur þátt í prófkjörum, muni ekki sætta sig við neitt annað en ströng bönn. Sérstaklega með tilliti til þess að frambjóðendur Repúblikanaflokksins hafi um árabil heitið því að banna þungunarrof, fái þeir tækifæri til þess.

DeSantis gengur hart fram

Ron DeSantis, ríkisstjóri Flórída, sem þykir líklegur til að tilkynna forsetaframboð á næstunni, skrifaði nýverið undir lög sem banna þungunarrof eftir sex vikna meðgöngu, sem er áður en flestar konur vita að þær ganga með barn.

Ríkisstjórinn hefur ekki verið feiminn við að flagga þessum aðgerðum sínum en aðrir frambjóðendur og þar á meðal Donald Trump, hafa gert lítið úr stuðningi þeirra við aðgerðir sem þessar af ótta við að viðbrögð almennra kjósenda.

„Ólíkt Trump, stendur DeSantis fastur á því að verja líf ófæddra barna,“ sagði talskona ríkisstjórans í vikunni.

Kannanir gefa til kynna að Trump hafi mikið forskot á DeSantis meðal kjósenda Repúblikanaflokksins. Hann hefur sömuleiðis safnað fúlgum fjár í kosningasjóð sinn eftir að hann var nýlega ákærður.

Kjósendur vilji ekki heyra um stolnar kosningar

Auðugir bakhjarlar Repúblikanaflokksins hafa ekki enn ekki fundið sér frambjóðenda sem þeir eru tilbúnir til að styðja. Þó Trump sé í góðri stöðu getur margt gerst áður en Repúblikanar velja sér forsetaframbjóðanda og forsetinn fyrrverandi á sér andstæðinga innan flokksins.

Landsnefnd Repúblikanafundins heldur um helgina samkomu fyrir áðurnefnda bakhjarla og áður en Trump stígur á svið í nótt, hafa andstæðingar hans staðið þar. Þeirra á meðal er Brian Kemp, ríkisstjóri Georgíu.

„Kjósendur vildu heyra hvað Repúblikanar voru að gera til að hjálpa þeim að berjast gegn hæstu verðbólgunni í fjörutíu ár. Þeir vildu ekki hlusta í marga mánuði af deilum um það hvort forsetakosningunum 2020 hefði verið stolið,“ sagði Kemp, samkvæmt frétt Politico.

Án þess að nefna Trump á nafn var Kemp að kenna honum um slæmt gengi Repúblikana í síðustu kosningum. Ríkisstjórinn varaði við því að ekki einn einasti óákveðni kjósandi myndi kjósa frambjóðanda Repúblikanaflokksins sem talaði um stolnar kosningar árið 2020. Það væri löngu liðin tíð.

Í frétt Politico segir að bakhjarlarnir auðugu hafi ekki komið sér saman um framhaldið og hvern þeir geti stutt, annan en Trump.