Sjáðu markið: Afmælisbarnið Hlín á­fram á skotskónum

Hlín hóf leikinn á hægri vængnum í 3-4-3 leikkerfi Kristianstad. Staðan var markalaus í hálfleik en þegar tíu mínútur voru liðnar af þeim síðari fékk heimaliðið vítaspyrnu. Hún fór forgörðum og aðeins þremur mínútum síðar komst Kristianstad yfir.

Hlín gerði svo út um lekinn á 72. mínútu, lokatölur 0-2. Markið var einkar glæsilegt og má sjá það hér að neðan. Var þetta þriðja mark Hlínar í síðustu fjórum leikjum og hennar fimmta mark á tímabilinu. Þá hefur hún gefið fjórar stoðsendingar.

Amanda Andradóttir hóf leik á varamannabekk Kristianstad en kom inn á þegar 66 mínútur voru liðnar. Diljá Ýr Zomers byrjaði leikinn sömuleiðis á bekknum en spilaði síðustu 13 mínúturnar í liði Norrköping.

Sigurinn lyftir Kristanstad upp í 5. sæti með 23 stig, átta minna en topplið Häcken. Norrköping er í 11. sæti með 10 stig, fjórum fyrir ofan fallsæti.