Akur­eyri og Egils­staðir væn­legri land­náms­kostir moskító­flugna

„Ekki er um moskító að ræða heldur tegund af forar­mý­sætt (Ani­sopodida­e) sem ber heitið forar­mý (Syl­vicola fenestra­lis). Þetta er al­gengt um allt land og við verðum því að bíða að­eins lengur eftir moskító­flugum!“ skrifar Matthías Svavar Al­freðs­son, skor­dýra­fræðingur hjá Náttúru­fræði­stofnun Ís­lands í svari við fyrir­spurn Vísis.

Íbúi í Reykja­vík bað Matthías um álit á því hvort um væri að ræða moskító­flugu. Í­búinn var þess full­viss um að hér væri á ferðinni moskító­flugur en líkt og flestir vita hefur flugna­tegundin aldrei lagt land undir fót hér á landi en er til staðar í ná­granna­landinu Græn­landi.

Gísli Már Gísla­son, prófessor emeritus í vatna­líf­fræði, sagði í Bítinu á Bylgjunni í fyrra að það væri einungis tíma­spurs­mál hve­nær tegundin myndi berast til Ís­lands.

Ýmsar kenningar eru uppi um það hvers vegna moskító­flugan hefur enn ekki borist hingað til lands og er ein sú að al­þjóða­flug­völlurinn sé á Reykja­nesi, á eina stóra land­svæði Ís­lands þar sem lítið sem ekkert sé um vot­lendi, sem er kjör­lendi moskító­flugunnar.

Muni lík­lega ekki berast hingað með vindum

Matthías segir kjör­lendi moskító­flugunnar vera vot­lendi í mjög víðum skilningi. Allar tegundir moskító­flugna þurfi vatn svo eggin klekist út, þar þroskast lirfur og púpa sig en þær þurfi ekki endi­lega mikið vatn.

„Upp­eldis­stöðvar geta allt eins verið ílát eða dekk sem safna rigningar­vatni. Sumar tegundir verpa eggjum í hola trjá­boli sem safna vatni og sumar kjósa ísalt vatn svo dæmi séu tekin. Hvar þær verpa eggjum sínum fer eftir tegundum,“ skrifar Matthías.

Hann segir moskító­flugur ekki fljúga hátt upp frá jörðu og því sé ó­lík­legt að þær geti borist til landsins með vindum. Væri það mögu­leiki væru þær lík­lega þegar búnar að nema land. Þær þurfi því að stóla á manninn til að komast hingað.

„Þær geta borist með flug­vélum til landsins. Það hjálpar vissu­lega til að al­þjóða­flug­völlurinn okkar er á stað þar sem að­stæður eru ekki góðar fyrir moskó­tó­flugur. Spurning hvort að milli­landa­flug til Akur­eyrar og Egils­staða sé ekki væn­legri kostur. Þær gætu líka borist til landsins með skipum til dæmis í gámum eða fylgt farar­tækjum ferða­manna.“