Flugvél Prigozhin sögð hafa verið skotin niður

Uppfært: Fréttaveitan Tass hefur staðfest að Prigozhin var um borð í flugvélinni.

Fleiri leiðtogar Wagner, eins og Dimtro Utkin, eru sagðir hafa verið um borð í flugvélinni. Í frétt RIA fréttaveitunnar segir að tíu hafi verið um borð í flugvélinni og allir séu látnir.

Verið var að fljúga flugvélinni frá Moskvu til Pétursborgar þegar hún brotlenti í Tver-héraði. Önnur flugvél í eigu auðjöfursins var einnig á flugi á svæðinu en Prigozhin var skráður farþegi í flugvélinni sem brotlenti.

Á Telegram-síðu, sem tengist málaliðahópnum, er haft eftir vitnum að flugvélin hafi verið skotin niður. Það hefur þó ekki verið staðfest.

Gerði uppreisn gegn Pútín

Prigozhin og málaliðar hans gerðu skammlífa uppreisn gegn Vladimír Pútín, forseta Rússlands, og forsvarsmönnum varnarmálaráðuneytisins í júní.

Prigozhin, hafði verið mjög gagnrýninn á forsvarsmenn Varnarmálaráðuneytis Rússlands um nokkuð skeið og sakað þá um spillingu og vanþekkingu svo eitthvað sé nefnt. Upp úr sauð svo þann 23. júní, þegar Prigozhin hélt því fram að rússneski herinn hefði gert árásir á bækistöð Wagner í austurhluta Úkraínu og að margir málaliðar hefðu fallið.

Þetta var eftir að því hafði verið lýst yfir að allir rússneskir málaliðar ættu að skrifa undir samninga við herinn. Prigozhin sagði það ekki koma til greina.

Hann lýsti því svo yfir að hann ætlaði að handsama forsvarsmenn ráðuneytisins og hersins en í kjölfarið hertóku málaliðarnir borgina Rostov í suðurhluta Rússlands og keyrðu þúsundir þeirra í átt að Moskvu. Rússneskir hermenn lögðu víða niður vopn, í stað þess að reyna að stöðva málaliðana en fáir ef einhverjir hermenn gengu til liðs við þá.

Pútín lýsti yfir stuðningi við Sergei Shoigu, varnarmálaráðherra, og Valery Gerasimov, formann herforingjaráðs Rússlands, en þá var send út yfirlýsing frá Wagner um að Rússland þyrfti nýjan forseta.

Málaliðar Wagner voru skammt frá Moskvu þegar Prigozhin snerist hugur og skipaði þeim að snúa við. Þá höfðu þeir skotið niður nokkrar þyrlur og eina flugvél en vegir höfðu verið grafnir í sundur og brýr sprengdar í loft upp til að hægja á þeim.

Því var lýst yfir að Alexander Lúkasjenka, einræðisherra Belarús, hefði komið að því að gera samkomulag milli auðjöfursins og forsetans en samkvæmt því myndi auðjöfurinn ekki verða saksóttur vegna uppreisnarinnar og málaliðar Wagner gætu farið til Belarús eða gengið til liðs við rússneska herinn.

Það er þrátt fyrir að Pútín hafði lýst því yfir að Prigozhin væri svikari og að uppreisnin yrði kramin.

Sagðist tryggja hagsmuni Rússa í Afríku

Frá því að hann hætti við uppreisnina hefur Prigozhin látið lítið fyrir sér fara og er hann sagður hafa reynt að koma sér í mjúkinn hjá Pútín aftur. Fyrr í vikunni sendi hann frá sér fyrsta myndbandið frá uppreisninni skammlífu en þá sagðist hann í Afríku.

Prigozhin sagðist vera að tryggja hagsmuni Rússlands í Afríku. Málaliðar Wagner hafa verið nokkuð umsvifamiklir í Afríku á undanförnum árum.

Blaðamaðurinn Christo Grozev hefur eftir heimildarmönnum sínum að Prigozhin hafi verið í Moskvu vegna fundarhalda um að leyniþjónusta rússneska hersins, sem kallast GRU, ætti mögulega að taka yfir hlutverk Wagner í Afríku.

Grozev segir auðjöfurinn hafa verið að reyna að koma í veg fyrir það og að hann hafi verið á leið aftur til Afríku.