Hákon Daði í B-deildina frá Íslendingaliði Gummersbach

Hákon var að hefja sitt þriðja tímabil hjá Gummersbach, sem leikur undir stjórn Guðjóns Vals Sigurðssonar. Elliði Snær Viðarsson leikur einnig með liðinu.

Hákon hafði fallið neðar í goggunarröðinni hjá Gummersbach eftir komu þriðja vinstri hornamannsins til liðsins. Hann hafði því lítið sem ekkert komið við sögu í æfingaleikjum Gummarsbach á undirbúningstímabilinu og í fyrstu tveimur leikjum deildarkeppninnar.

„Vegna stöðunnar hef ég verið að leita að öðru liði til þess að spila með. Loksins í dag þá samdi ég við Hagen,“ sagði Hákon Daði í samtali við handbolta.is í gær.

Hagen leikur sem áður segir í næstefstu deild Þýskalands og hafnaði liðið í tíunda sæti á síðasta tímabili. Hákon þekkir vel til í deildinni, enda spilaði hann í þýsku B-deildinni með Gummersbach og lék stórt hlutverk er liðið vann sér inn sæti í efstu deild.