Bjóða Jones að borga tólf milljarða í stað tvö hundruð

Foreldrarnir hafa boðið Jones að greiða þeim að minnsta kosti 85 milljónir dala (11,7 milljarða króna) yfir tíu ára tímabil. AP fréttaveitan segir þetta tilboð hafa verið lagt á borðið í síðustu viku í málaferlum vegna umsóknar Jones um gjaldþrotaskipti og gjaldþrotaskipta fyrirtækis hans, Free Speech Systems.

Þann 19. september árið 2012 voru tuttugu börn á aldrinum fimm til tíu ára skotin til bana í Sandy Hook auk sex starfsmanna skólans.

Jones rekur miðilinn InfoWars þar sem hann er ekki síst þekktur fyrir vanstillt reiðiöskur í þáttum sínum. Þar hefur hann meðal annars sakað Barack Obama, fyrrverandi Bandaríkjaforseta, um að hafa gert froska samkynhneigða.

Í gegnum árin hefur hann ítrekað haldið því fram að börnin sem myrt voru í árásinni hafi ekki verið raunveruleg og að foreldrar þeirra séu leikarar. Áhorfendur hans hafa áreitt foreldrana og ógnað þeim.

Eftir langvarandi málaferli foreldranna gegn Jones komust dómarar í fyrra að þeirri niðurstöðu að hann ætti að greiða þeim um 1,5 milljarða dala. Það samsvarar rúmum tvö hundruð milljörðum  milljarði króna. Jones sagðist ekki vera borgunarmaður fyrir þessum miskabótum.

Foreldrarnir hafa gagnrýnt Jones fyrir að lifa í vellystingum og eyða peningum eins og enginn sé morgundagurinn. Hann hefur hins vegar ekki greitt þeim neitt enn.

Sjá einnig: Borgar ekki foreldrunum en spreðar peningum

Þá hefur hann sótt um gjaldþrotaskipti en dómari komst nýverið að þeirri niðurstöðu að þó hann yrði gjaldþrota bæri honum að greiða skaðabæturnar.

Í bréfi þar sem áðurnefnd tilboð var opinberað gagnrýna lögmenn foreldranna Jones aftur harðlega fyrir lífsstíl hans. Hann er sagður hafa dregið úr virði eigna sinna, neitað að selja eignir og saka þeir hann um að neita að afhenda fjármálagögn sem honum hefur verið gert að afhenda.

Lögmennirnir segja að Jones eigi ekki að fá meiri tíma til að komast hjá skuldbindingum sínum og leggja þeir til tvo kosti. Annar er að selja eigi eignir hans og afhenda foreldrunum það sem eftir er. Hinn kosturinn er að hann greiði foreldrunum átta og hálfa milljón dala á ári (1,2 milljarðar króna) í tíu ár og helming allra tekna sem fara yfir níu milljónir dala á ári.

Í frétt AP er haft eftir lögmanni Jones að hann ráði ekki við að borga slíkar upphæðir.

Segist geta borgað fjórar milljónir á ári

Lögmenn hans lögðu fram áætlun þann 18. nóvember um að hann gæti greitt um fjórar milljónir dala á ári en fyrri áætlanir höfðu sagt hann geta greitt sjö til tíu milljónir.

Free Speech Systems selur fæðubótarefni, klæðnað og aðrar vörur en áætlað er, af forsvarsmönnum fyrirtækisins sjálfum, að tekjurnar af því séu um 19,2 milljónir dala á ári. Kostnaður er áætlaður um 14,3 milljónir.

Á meðan að málaferlin vegna gjaldþrotaskiptanna hafa farið fram, hefur Jones fengið tuttugu þúsund dali á tveggja vikna frest í greiðslur frá Free Speech Systems. Það samsvarar rúmum 5,4 milljónum króna á mánuði. Það var nýverið hækkað af umboðsmanni sem skipaður af dómstólum í 57.700 dali á tveggja vikna fresti, sem samsvarar um sextán milljónum króna á mánuði.

Dómari hafnaði þeirri hækkun þó og sagði hana ekki hafa verið gerða í samræmi við lög. Þá sagði hann að ef Jones tæki ekki tilboði foreldranna myndi hann ákveða hvað Jones þyrfti að greiða foreldrunum og öðrum sem hann skuldar.