Til stendur að flytja Eddu Björk til Noregs í nótt

Þetta staðfestir Jóhannes Karl Sveinsson, verjandi hennar, í samtali við Vísi. Hann segir að fangelsinu á Hólmsheiði, þar sem Edda Björk sætir nú gæsluvarðhaldi, hafi borist símtal frá stoðdeild Ríkislögreglustjóra um að Edda Björk yrði sótt í fangelsið í kvöld og í framhaldinu flutt til Noregs. 

Edda Björk var handtekin í fyrrakvöld á grundvelli norrænnar handtökuskipunar og úrskurðuð í gæsluvarðhald í framhaldi af því. Jóhannes Karl segir að sá úrskurður hafi verið kærður til Landsréttar en niðurstaða hans liggi ekki enn fyrir.

Í sumar var greint frá því að norsk yfirvöld hafi krafist þess að Edda yrði handtekin og framseld til Noregs vegna forræðisdeilna hennar við eiginmann sinn fyrrverandi. Sá er íslenskur en býr í Noregi. Hann fer einn með forsjá sona þeirra þriggja og eru þeir með lögheimili hjá honum en Edda Björk flutti þá til Íslands.

Krefst þess að Edda verði ekki afhent úr varðhaldi

Jóhannes Karl segist hafa fyrir skömmu gert kröfu til þess héraðsdómara sem kvað upp gæsluvarðhaldsúrskurðinn að hann úrskurði þegar í stað, á grundvelli laga um meðferð sakamála, að Edda Björk verði ekki afhent úr varðhaldinu fyrr en Landsréttur hefur úrskurðað í málinu.

Í samtali við Vísi segir hann að úrskurðar Landsréttar hafi verið vænta í dag eða í síðasta lagi á morgun og að Edda Björk hafi búist við því að hafa morgundaginn til þess að ganga frá sínum málum ef til þess kæmi að úrskurðurinn yrði staðfestur.

Verði hún flutt til Noregs í nótt sé búið að svipta hana rétti hennar til þess að skjóta máli sínu til æðra dómstóls. „Þetta er auðvitað risastórt áfall.“

Fresta eigi afhendingu á grundvelli mannúðarsjónarmiða

Jóhannes Karl segir að Landsréttur hafi staðfest endanlega ákvörðun Héraðssaksóknara um afhendingu Eddu Bjarkar til Noregs föstudaginn 24. nóvember. 

Í lögum um handtöku og afhendingu manna til og frá Íslandi vegna refsiverðra verknaða á grundvelli handtökuskipunar segir að þegar endanleg ákvörðun um afhendingu á grundvelli norrænnar handtökuskipunar liggur fyrir skuli afhenda eftirlýstan mann innan fimm sólarhringa.

Hins vegar segir í lögunum að ríkissaksóknara sé heimilt að fresta afhendingu ef ríkar mannúðarástæður mæla með því.

Jóhannes Karl segir að hann hafi fært rök fyrir því að ríkar mannúðarástæður mæli með frestun afhendingar Eddu Bjarkar þar sem dagsetning réttarhalda yfir henni í Noregi hafi ekki verið ákveðin. Með því að afhenda hana norskum yfirvöldum sé verið að afhenda hana í ótímabundið gæsluvarðhald ytra.

Má ekki hringja í verjanda sinn

Jóhannes Karl segist hafa fengið símtal frá Eddu Björk úr fangelsinu í kvöld þar sem hún tjáði honum hvað til stendur. Nú sé klukkan hins vegar orðin 22 og því megi hún ekki nota síma fangelsins.

Því séu hann og fjölskylda Eddu Bjarkar algjörlega ómeðvituð um það hvað gerist næst.

Fréttin hefur verið uppfærð.