Fær­eyingar safna fyrir Grind­víkinga

Í frétt færeyska fréttamiðilsins In.fo. segir að íslenski Rauði krossinn hafi stofnað tímabundna söfnun til að hjálpa þeim sem hafa orðið fyrir áhrifum af eldgosinu í Grindavík og nú hafi Færeyingar, „fyrirtæki og einstaklingar,“ líka ákveðið að veita nágrönnum sínum stuðning.

„Hvussu kanst tú hjálpa?“ eða „Hvernig getur þú hjálpað?“ spyr Rauði krossinn í Færeyjum.

Vilji fólk stuðla að mannúðaraðstoð íslenska Rauða krossins sé það velkomið að leggja inn á bankareikning Rauða krossins í Færeyjum og merkja við hann „Ísland“. Fólk geti líka sett af stað sína eigin söfnun og er bent á upplýsingar á vef Rauða krossins.

Vildu hjálpa

„Þau höfðu samband og spurðu hvernig þau gætu hjálpað. Þau stungu sjálf upp á því að hefja sína söfnun líka og þau vildu leggja sitt af mörkum. Þau eru bara svona góð og vildu hjálpa. Það er yndislegt að fá svona skilaboð og stuðning frá öðrum landsfélögum,“ segir Oddur Freyr Þorsteinsson upplýsingafulltrúi Rauða krossins á Íslandi. Hann hefur ekki heyrt af söfnun hjá öðrum landsfélögum.

„Þetta er mikil frændþjóð og þau hugsa mikið til okkar. Þegar þau sáu fréttirnar vildu þau gera það sem þau gátu. Við erum afskaplega þakklát,“ segir Oddur.

Hann segir að enn eigi eftir að ákveða hvernig peningunum frá Færeyjum verði varið en að líklegt sé að peningurinn renni í þeirra söfnun sem fer beint til Grindvíkinga.

Öflug söfnun á Íslandi

Söfnun Rauða krossins á Íslandi fyrir Grindvíkinga hefur farið mjög vel af stað að Odds.

„Hún hefur gengið mjög vel. Það hefur komið á óvart hversu öflugar og góðar undirtektir við höfum fengið,“ segir Oddur. Hann segir þó í ljósi atburða að mjög skiljanlegt sé að Íslendingar vilji leggja Grindvíkingum lið.

Söfnunin hófst í raun í nóvember þegar bærinn var fyrst rýmdur og var að sögn Odds aðallega hugsuð til að styrkja þeirra starf og neyðarviðbragð vegna Grindvíkinga. En vegna þess hve vel hafi gengið hafi verið ákveðið að úthluta peningunum beint til Grindvíkinga. Nú þegar hafi fimm milljónum verið úthlutað og er stefnt á að halda því áfram meðfram söfnuninni.

„Það er úthlutunarnefnd að störfum og það verður haldið áfram að úthluta þessum peningum. Áherslan er öll á að styðja Grindvíkinga núna, ekkert annað,“ segir Oddur og að skilyrði úthlutunar sé að finna á síðu söfnunarinnar. Sótt er um úthlutun í þjónustumiðstöð fyrir Grindvíkinga í Tollhúsinu í Grindavík.

Margir með húsnæðisáhyggjur

Oddur Freyr segir að fleiri hafi frá í nóvember leitað í sálrænan stuðning hjá samtökunum og sem dæmi hafi fjölgað símtölum í 1717.

„Svo hefur fólk farið í þjónustumiðstöðina. En fólk er aðallega að velta fyrir sér húsnæðisstuðningi. Það er mjög eðlilegt að fólk hafi fjárhagsáhyggjur þegar óvissan er svona mikil.“

Hægt er að styðja söfnunina hér.