Sjónvarpsmanninnum hefur verið sýnd gífurelga mikil athygli í Rússlandi.
Carlson, sem er sjálfstætt starfandi og birtir viðtöl sín á samfélagsmiðlinum X, áður Twitter, birti í gærkvöldi myndband þar sem hann fór yfir ástæður sínar fyrir því að taka viðtal við Pútín. Þar sagði hann meðal annars að vestrænir fjölmiðlar vildu ekki segja frá hlið Rússlands varðandi innrásina.
Sjá einnig: Tucker Carlson í Moskvu til að taka viðtal við Vladimir Pútín
Dmítrí Peskóv, talsmaður Pútíns, sagði í dag að Carlson hefði ekki rétt fyrir sér þegar hann sagði að enginn blaðamaður af Vesturlöndum hefði reynt að taka viðtal við Pútín. Carlson hefði engar upplýsingar um það.
Peskóv sagði fjölmargar beiðnir um viðtöl hafa borist til Kreml en þeim hefði verið neitað, þar sem enginn vilji væri til að ræða við blaðamenn sem tækju einhliða afstöðu.
Sjá einnig: Segir barist fyrir tilvist Rússlands
Þá sagði talsmaðurinn að Carlson væri ekki hliðhollur Rússlandi, né Úkraínu. Þess í stað væri hann hliðhollur Bandaríkjunum. Í það minnsta hefði hann öðruvísi skoðanir en „hefðbundnir angló-saxneskir fjölmiðlar“.
Francis Scarr, blaðamaður BBC, fylgist með rússneskum fjölmiðlum. Hann hefur eftir Vladimir Solovyov, eini helstu málpípu Pútíns í Rússlandi, að viðtalið muni sýna fram á einhliða fréttaflutning um innrás Rússa.
Leading Kremlin propagandist Vladimir Solovyov says Tucker Carlson s interview will "break through the blockade and the narrative of Putin s unprovoked, brutal invasion of Ukraine"
— Francis Scarr (@francis_scarr) February 7, 2024
So, just another opportunity for Putin to trot out his favourite talking points at length then pic.twitter.com/LFtisOGAlj
Carlson hefur lengi verið gagnrýninn á stuðning Vesturlanda við Úkraínu og borið út málflutning yfirvalda í Kreml um að Rússland beri ekki ábyrgð á innrásinni.
Sjá einnig: Viðræðurnar snerust um uppgjöf, ekki frið
Ríkismiðlar Rússlands hafa um mánaðaskeið birt myndskeið af Carlson, að skipan yfirvalda. Mother Jones birti í fyrra frétt um minnisblað til rússneskra miðla um það hve mikilvægt það væri að básúna Carlson vegna gagnrýni hans á yfirvöld í Bandaríkjunum og Úkraínu.
Í minnisblaðinu ku vera tilvísun í ummæli Carlson þar sem hann sagði Rússa einungis vera að verja hagsmuni sína og tryggja öryggi sitt með innrásinni í Úkraínu.
Rússneskir miðlar hafa sýnt ferð Carlson til Rússlands gífurlegan áhuga. Hér að neðan má sjá myndband sem gert var af fréttakonu Daily Beast sem fylgist með rússneskum fjölmiðlum.
Í frétt Moscow Times er haft eftir heimildarmanni miðilsins úr Kreml að Rússar hafi lengi búist við Carlson. Hann sé velkominn í Rússlandi. Þá segir heimildarmaðurinn að jafnvel þó Carlson hefði ekki fengið viðtal við Pútín hefði forsetinn hagnast á ferð hans til Rússlands. Viðbrögðin við ferðinni sýndu það nú þegar.
Þá segir annar að viðtalið verði sýnt í rússneskum fjölmiðlum og þá sérstaklega gagnrýni Carlson í garð Demókrata í Bandaríkjunum. Það muni hjálpa Pútín í komandi forsetakosningum og viðtalið muni sömuleiðis hafa áhrif á forsetakosningarnar í Bandaríkjunum í nóvember.
Moscow Times sagði frá því síðasta sumar að innan veggja Kreml hefði kviknað sú hugmynd að bjóða Carlson á svið með Pútín á alþjóðlegri efnahagsráðstefnu í Pétursborg.
Í frétt miðilsins stóð þá að Carlson, sem væri einn þekktasti sjónvarpsmaður Bandaríkjanna, hefði lengi verið litinn jákvæðum augum í Kreml. Það væri vegna gagnrýni hans á Demókrataflokkinn og yfirvöld í Úkraínu.
Erfiðar aðstæður fyrir fjölmiða í Rússlandi
Á undanförnum árum hefur ríkisstjórn Pútíns fangelsað fjölda rússneskra blaðamanna og lokað fjölmörgum frjálsum fjölmiðlum í Rússlandi. Aðgerðir gegn frjálsum fjölmiðlum í Rússlandi hafa aukist til muna í kjölfar innrásarinnar. Nánast allir frjálsir fjölmiðlar í landinu hafa verið gerðir útlægir og eru árásir á blaðamenn tíðar.
Þá hefur verið lokað á aðgengi almennings í Rússlandi að fjölmörgum fjölmiðlum heimsins.
Sjá einnig: Einn af morðingjum Politkovskayu náðaður eftir herþjónustu í Úkraínu
Ríkið situr í 164 sæti af 180 á lista Reporters Without Borders um fjölmiðlafrelsi í heiminum.
Tveir blaðamenn sem vinna fyrir bandaríska fjölmiðla sitja í fangelsi í Rússlandi um þessar mundir. Það eru þau Evan Gershkovich, frá Wall Street Journal, og Alsu Kurmasheva frá Radio Free Europe.
Gershkovich er sakaður um njósnir og hefur setið í fangelsi frá því í mars í fyrra. Gæsluvarðhald hans var síðast framlengt í lok janúar en ekki hefur verið opinberað hvenær réttarhöldin gegn honum eiga að hefjast. Forsvarsmenn Wall Street Journal segja hann hafa verið við fréttastörf í borginni Yekaterinburg þegar hann var handtekinn.
Sjá einnig: Neituðu að sleppa Whelan og Gershkovich fyrir njósnara
Alþjóðlegi sakamáladómstóllinn hefur gefið út handtökuskipun á hendur Pútíns fyrir stríðsglæpi. Handtökuskipunin er gefin út vegna fjölda úkraínska barna sem rænt hefur verið til Rússlands.
